dilbar ye wo hai jis ne dil ko dagha diya hai

dilbar ye vo hai jis ne dil ko daġhā diyā hai

ai chashm dekh tujh ko maiñ ne sujhā diyā hai

teġh-e-sitam se merā jo ḳhūñ-bahā diyā hai

qātil ne mere dil kā ye ḳhūñ-bahā diyā hai

naqsh qadam galī kā terī banā diyā hai

kyuuñ kar uThūñ ki dil ne mujh ko biThā diyā hai

ai chashm gar ye zā hai rone ko tere zahmat

ro ro ke abr ko bhī tū ne rulā diyā hai

sar-rishta-e-vafā se kyā sham'-rū haiñ vāqif

ham ne patang un se milnā uḌā diyā hai

dil de ke jaan kā muft ik rog hī ḳharīdā

daulat se terī maiñ ne ye kuchh liyā diyā hai

jaate nazar jidhar hī ik nuur jalva-gar hai

mukhḌe se aaj parda kisī ne uThā diyā hai

tū paan khā ke hañsnā ik sahl sā hai samjhā

ye barq vo hai jis ne 'ālam jalā diyā hai

kyuuñ ham se ho bigaḌte ham ne to shaiḳh sāhab

holī se peshtar hī tum ko banā diyā hai

kyuuñ kar na mere dil kā shīsha ho TukḌe TukḌe

nazroñ se is ko zālim tū ne girā diyā hai

paañv se kyā jagāyā tū ne hī mujh ko goyā

Thokar se baḳht-e-ḳhufta merā jagā diyā hai

kyā jānūñ 'ishq kyā hai lekin kisī ne 'ehsāñ'

ik aag kā sā sho'la dil ko lagā diyā hai

dilbar ye wo hai jis ne dil ko dagha diya hai

ai chashm dekh tujh ko main ne sujha diya hai

tegh-e-sitam se mera jo KHun-baha diya hai

qatil ne mere dil ka ye KHun-baha diya hai

naqsh qadam gali ka teri bana diya hai

kyun kar uThun ki dil ne mujh ko biTha diya hai

ai chashm gar ye za hai rone ko tere zahmat

ro ro ke abr ko bhi tu ne rula diya hai

sar-rishta-e-wafa se kya sham'-ru hain waqif

hum ne patang un se milna uDa diya hai

dil de ke jaan ka muft ek rog hi KHarida

daulat se teri main ne ye kuchh liya diya hai

jate nazar jidhar hi ek nur jalwa-gar hai

mukhDe se aaj parda kisi ne uTha diya hai

tu pan kha ke hansna ek sahl sa hai samjha

ye barq wo hai jis ne 'alam jala diya hai

kyun hum se ho bigaDte hum ne to shaiKH sahab

holi se peshtar hi tum ko bana diya hai

kyun kar na mere dil ka shisha ho TukDe TukDe

nazron se is ko zalim tu ne gira diya hai

panw se kya jagaya tu ne hi mujh ko goya

Thokar se baKHt-e-KHufta mera jaga diya hai

kya jaanun 'ishq kya hai lekin kisi ne 'ehsan'

ek aag ka sa sho'la dil ko laga diya hai