dili chingariyon se jab koi shoala jawan hoga

dilī chingāriyoñ se jab koī sho.ala javāñ hogā

ḳhamoshī chīḳh uTThegī aur insāñ be-zabāñ hogā

kabhī tum bhī to dīvār-e-anā ko toḌ kar dekho

mohabbat ke sivā kuchh bhī na apne darmiyāñ hogā

mizāj-e-vaqt meñ yaksāniyat dekhī kabhī tum ne

ḳhafā hai aaj jis par kal usī par mehrbāñ hogā

koī hogā mafād us kā yaqīnan tum se vābasta

amīr-e-shahr kyā yuuñ hī kisī par mehrbāñ hogā

hamāre qāfile kī gar yahī hālat rahī to kal

na gard-e-kārvāñ hogī na shor-kārvāñ hogā

'nisār' apne suḳhan meñ tajraba hai zindagānī kā

hamāre dard kā ehsās lahje se bayāñ hogā

dili chingariyon se jab koi shoala jawan hoga

KHamoshi chiKH uTThegi aur insan be-zaban hoga

kabhi tum bhi to diwar-e-ana ko toD kar dekho

mohabbat ke siwa kuchh bhi na apne darmiyan hoga

mizaj-e-waqt mein yaksaniyat dekhi kabhi tum ne

KHafa hai aaj jis par kal usi par mehrban hoga

koi hoga mafad us ka yaqinan tum se wabasta

amir-e-shahr kya yun hi kisi par mehrban hoga

hamare qafile ki gar yahi haalat rahi to kal

na gard-e-karwan hogi na shor-karwan hoga

'nisar' apne suKHan mein tajraba hai zindagani ka

hamare dard ka ehsas lahje se bayan hoga