dilkash hai masafat ka maza rah-e-thakan mein

dilkash hai masāfat kā maza rāh-e-thakan meñ

ik ḳhushbū-e-jannat hai mirī ḳhāk-e-vatan meñ

yā farhat-e-fan kī hai koī achchhī alāmat

yā dard-e-tamannā hai mire rang-e-suḳhan meñ

sunñe ko mayassar nahīñ yaañ koī bhī naġhma

kahne ko to bulbul bhī nahīñ mere chaman meñ

ye dil kī masarrat hai ki nazroñ kā taqāzā

tāroñ kī ravish aa.ī hai phūloñ kī phaban meñ

maiñ qatra-e-gauhar huuñ jo āñkhoñ se hai Tapkā

tū shabnamī resham hai jo chhalkā hai saman meñ

chal maqtal-e-ulfat ke muqaddar se barī hoñ

chal palte haiñ ham mil ke rah-e-dār-o-rasan meñ

tum bharte ho dam apnī saḳhāvat meñ uchhal kar

tum ko ho ḳhabar kyā ki maza kyā hai ghuTan meñ

ik barg-e-tamanna thī so jal uTThī hai 'kāvish'

ik vāda-e-dil thā so nazar aaya shikan meñ

dilkash hai masafat ka maza rah-e-thakan mein

ek KHushbu-e-jannat hai meri KHak-e-watan mein

ya farhat-e-fan ki hai koi achchhi alamat

ya dard-e-tamanna hai mere rang-e-suKHan mein

sunne ko mayassar nahin yan koi bhi naghma

kahne ko to bulbul bhi nahin mere chaman mein

ye dil ki masarrat hai ki nazron ka taqaza

taron ki rawish aai hai phulon ki phaban mein

main qatra-e-gauhar hun jo aankhon se hai Tapka

tu shabnami resham hai jo chhalka hai saman mein

chal maqtal-e-ulfat ke muqaddar se bari hon

chal palte hain hum mil ke rah-e-dar-o-rasan mein

tum bharte ho dam apni saKHawat mein uchhal kar

tum ko ho KHabar kya ki maza kya hai ghuTan mein

ek barg-e-tamanna thi so jal uTThi hai 'kawish'

ek wada-e-dil tha so nazar aaya shikan mein