dilon ke beach badan ki fasil uTha di jae

diloñ ke beach badan kī fasīl uThā dī jaa.e

simaT rahī hai masāfat zarā baḌhā dī jaa.e

hamārī samt kabhī zahmat-e-safar to karo

tumhārī raah meñ bhī kahkashāñ bichhā dī jaa.e

banī to hogī kahīñ sarhad-e-garāñ-goshī

tumhīñ batāo kahāñ se tumheñ sadā dī jaa.e

kisī ke kaam to aa.e ḳhulūs kī ḳhushbū

mizāj meñ na sahī jism meñ basā dī jaa.e

ye sochte nahīñ kyuuñ fāsle tavīl hue

ye pūchhte haiñ ki raftār kyuuñ baḌhā dī jaa.e

ye mahviyat na kahīñ tujh se pher de sab ko

tirī taraf se tavajjoh zarā haTā dī jaa.e

takallufāt kī pur-pech vādiyāñ kab tak

ba-rāh-e-rāst unheñ dāvat-e-vafā dī jaa.e

sunī haiñ ham ne bahut tīrgī pe taqrīreñ

mile na lafz agar raushnī bujhā dī jaa.e

guzarne vaalī havā ḳhud pata lagā legī

zarā sī aag kisī raakh meñ dabā dī jaa.e

dilon ke beach badan ki fasil uTha di jae

simaT rahi hai masafat zara baDha di jae

hamari samt kabhi zahmat-e-safar to karo

tumhaari rah mein bhi kahkashan bichha di jae

bani to hogi kahin sarhad-e-garan-goshi

tumhin batao kahan se tumhein sada di jae

kisi ke kaam to aae KHulus ki KHushbu

mizaj mein na sahi jism mein basa di jae

ye sochte nahin kyun fasle tawil hue

ye puchhte hain ki raftar kyun baDha di jae

ye mahwiyat na kahin tujh se pher de sab ko

teri taraf se tawajjoh zara haTa di jae

takallufat ki pur-pech wadiyan kab tak

ba-rah-e-rast unhen dawat-e-wafa di jae

suni hain hum ne bahut tirgi pe taqriren

mile na lafz agar raushni bujha di jae

guzarne wali hawa KHud pata laga legi

zara si aag kisi rakh mein daba di jae