dilon ki pesh koi wardat karne lagun

diloñ kī pesh koī vārdāt karne lagūñ

maiñ ghaat rāz-e-darūñ hī ke saath karne lagūñ

mujhe to itnā salīqa abhī nahīñ aayā

ki tum se apne buzurgoñ se baat karne lagūñ

dinoñ kī dhuup Dhale shaam ho maiñ ghar aa.uuñ

tumhārī zulf ke saa.e meñ raat karne lagūñ

rah-e-vafā kā taqāza hai be-sar-o-sāmāñ

'ubūr josh meñ dajla furāt karne lagūñ

maiñ apne she'r ke kuuze meñ sirf aañsū kyā

karūñ jo jam' tirī kā.enāt karne lagūñ

yahī hai rabt-e-mohabbat kī yaar bebākī

ġhazal kī baat karūñ tujh se baat karne lagūñ

jidhar bhī dekhūñ faqat tū hī tū nazar aa.e

tirī taraf hī agar iltifāt karne lagūñ

kafan-farosh kī ḳhushiyoñ ke vāste 'misdāq'

maiñ apnī maut se pahle vafāt karne lagūñ

dilon ki pesh koi wardat karne lagun

main ghat raaz-e-darun hi ke sath karne lagun

mujhe to itna saliqa abhi nahin aaya

ki tum se apne buzurgon se baat karne lagun

dinon ki dhup Dhale sham ho main ghar aaun

tumhaari zulf ke sae mein raat karne lagun

rah-e-wafa ka taqaza hai be-sar-o-saman

'ubur josh mein dajla furaat karne lagun

main apne she'r ke kuze mein sirf aansu kya

karun jo jam' teri kaenat karne lagun

yahi hai rabt-e-mohabbat ki yar bebaki

ghazal ki baat karun tujh se baat karne lagun

jidhar bhi dekhun faqat tu hi tu nazar aae

teri taraf hi agar iltifat karne lagun

kafan-farosh ki KHushiyon ke waste 'misdaq'

main apni maut se pahle wafat karne lagun