dilon mein aag nahin aankh mein sharara nahin

diloñ meñ aag nahīñ aañkh meñ sharāra nahīñ

ye kaise log haiñ luTnā jinheñ gavāra nahīñ

ye kārobār-e-mohabbat hai luTne vāloñ kā

yahāñ pe kah diyā kis ne tujhe ḳhasāra nahīñ

jo hāl-e-dil hai min-o-an raqam kiyā jaa.e

ki ab zarūrat-e-tashbīh-o-isti.āra nahīñ

varaq varaq vahī rauñde hue mazāmīñ haiñ

ḳhayāl apne 'alāva kahīñ kuñvārā nahīñ

ḳhudī ke ruup meñ ham ne anā ko paalā hai

ḳhudī se varna ta'alluq koī hamārā nahīñ

ham apne vāste jiite haiñ ḳhud pe marte haiñ

hamāre saath kisī aur kā guzārā nahīñ

dilon mein aag nahin aankh mein sharara nahin

ye kaise log hain luTna jinhen gawara nahin

ye karobar-e-mohabbat hai luTne walon ka

yahan pe kah diya kis ne tujhe KHasara nahin

jo haal-e-dil hai min-o-an raqam kiya jae

ki ab zarurat-e-tashbih-o-istiara nahin

waraq waraq wahi raunde hue mazamin hain

KHayal apne 'alawa kahin kunwara nahin

KHudi ke rup mein hum ne ana ko pala hai

KHudi se warna ta'alluq koi hamara nahin

hum apne waste jite hain KHud pe marte hain

hamare sath kisi aur ka guzara nahin