dilon mein dushmanon ke is tarah Dar bol uThte hain

diloñ meñ dushmanoñ ke is tarah Dar bol uThte haiñ

gavāhī ko chhupāte haiñ to manzar bol uThte haiñ

mirī sachchā.ī merī be-gunāhī sab pe zāhir hai

ki ab jañgal kueñ sahrā samundar bol uThte haiñ

vo patthar-dil sahī lekin hamārā bhī ye da.avā hai

hamāre lab jinheñ chhū leñ vo patthar bol uThte haiñ

badal jaate haiñ ik lamhe meñ hī tārīḳh ke dhāre

kabhī jo mauj meñ aa kar qalandar bol uThte haiñ

ye kyā jaadū hai vo jab bhī mire milne ko aatā hai

ḳhushī se ghar ke sab dīvār aur dar bol uThte haiñ

zabān-e-haq kisī ke jabr se bhī ruk nahīñ saktī

ki neze kī anī par bhī Tañge sar bol uThte haiñ

laboñ kī qaid se kyā farq aayā dil kī bātoñ meñ

ki saare lafz āñkhoñ se ubhar kar bol uThte haiñ

ajab ahl-e-sitam ahl-e-vafā meñ Than ga.ī 'haidar'

sitam karte haiñ vo aur ye mukarrar bol uThte haiñ

dilon mein dushmanon ke is tarah Dar bol uThte hain

gawahi ko chhupate hain to manzar bol uThte hain

meri sachchai meri be-gunahi sab pe zahir hai

ki ab jangal kuen sahra samundar bol uThte hain

wo patthar-dil sahi lekin hamara bhi ye dawa hai

hamare lab jinhen chhu len wo patthar bol uThte hain

badal jate hain ek lamhe mein hi tariKH ke dhaare

kabhi jo mauj mein aa kar qalandar bol uThte hain

ye kya jadu hai wo jab bhi mere milne ko aata hai

KHushi se ghar ke sab diwar aur dar bol uThte hain

zaban-e-haq kisi ke jabr se bhi ruk nahin sakti

ki neze ki ani par bhi Tange sar bol uThte hain

labon ki qaid se kya farq aaya dil ki baaton mein

ki sare lafz aankhon se ubhar kar bol uThte hain

ajab ahl-e-sitam ahl-e-wafa mein Than gai 'haidar'

sitam karte hain wo aur ye mukarrar bol uThte hain