dilon mein habs ka aalam purani aadaton se hai

diloñ meñ habs kā 'ālam purānī ādatoñ se hai

laboñ par talḳhiyoñ kā zahr bigḌe zā.iqoñ se hai

jo ujḌā shahr ḳhvāboñ kā to apnī bhī uḌī hai gard

kisī sūkhe hue dariyā kī sūrat muddatoñ se hai

ye kaalī raat kā dariyā bahā kar le gayā sūraj

hirāsāñ sub.h ke sāhil pe dil tārīkiyoñ se hai

mahakte phuul bhī Dasne lage haiñ saañp kī sūrat

fazā bāġhoñ ke andar bhī diloñ ke mausamoñ se hai

unhīñ lamhoñ kī aahaT se milīñ bedāriyāñ mujh ko

mire dariyā kī jaulānī samay ke pāniyoñ se hai

vo aañch aane lagī ḳhud se ki dil Darne lagā apnā

jahannum ruuh kā bhaḌkā huā ḳhāmoshiyoñ se hai

khulīñ āñkheñ to sab kuchh nuur meñ Duubā huā paayā

mire sūraj kī tābānī nazar ke shobadoñ se hai

'nadīm' is raah meñ sadiyoñ kī dīvāreñ bhī haa.il haiñ

na.ī duniyā abhī tak oT meñ in zulmatoñ se hai

dilon mein habs ka 'alam purani aadaton se hai

labon par talKHiyon ka zahr bigDe zaiqon se hai

jo ujDa shahr KHwabon ka to apni bhi uDi hai gard

kisi sukhe hue dariya ki surat muddaton se hai

ye kali raat ka dariya baha kar le gaya suraj

hirasan subh ke sahil pe dil tarikiyon se hai

mahakte phul bhi Dasne lage hain sanp ki surat

faza baghon ke andar bhi dilon ke mausamon se hai

unhin lamhon ki aahaT se milin bedariyan mujh ko

mere dariya ki jaulani samay ke paniyon se hai

wo aanch aane lagi KHud se ki dil Darne laga apna

jahannum ruh ka bhaDka hua KHamoshiyon se hai

khulin aankhen to sab kuchh nur mein Duba hua paya

mere suraj ki tabani nazar ke shobadon se hai

'nadim' is rah mein sadiyon ki diwaren bhi hail hain

nai duniya abhi tak oT mein in zulmaton se hai