dilon mein KHak si uDti hai kya na jaane kya

diloñ meñ ḳhaak sī uḌtī hai kyā na jaane kyā

talāsh kartī hai pal pal havā na jaane kyā

zarā sā kaan lagā ke kabhī suno ga.e raat

kahīñ se aatī hai gum-sum sadā na jaane kyā

musāfiroñ ke diloñ meñ ajab ḳhazāne the

ziyāñ safar thā magar rāsta na jaane kyā

vo kah rahā thā na jhāñkūñgā aaj sub.h is meñ

mujhe dikhā.e yahī ā.īna na jaane kyā

duā ke phuul kī ḳhushbū sā phailne vaalā

vo ḳhud meñ DhūñDhtā thā gum-shuda na jaane kyā

nahīñ hai kis kī nazar meñ ufuq koī na koī

is aañkh meñ thī koī shai judā na jaane kyā

tamām shahr meñ gāḌhe dhuveñ kā manzar hai

likhā huā thā yahāñ jā-ba-jā na jaane kyā

vahī bichhaḌte diloñ kī faza-e-ashk-ālūd

vahī safar ki purānā nayā na jaane kyā

nikal gayā hai ḳhalāoñ kī samt ai 'bānī'

navāh-e-jāñ se guzartā huā na jaane kyā

dilon mein KHak si uDti hai kya na jaane kya

talash karti hai pal pal hawa na jaane kya

zara sa kan laga ke kabhi suno gae raat

kahin se aati hai gum-sum sada na jaane kya

musafiron ke dilon mein ajab KHazane the

ziyan safar tha magar rasta na jaane kya

wo kah raha tha na jhankunga aaj subh is mein

mujhe dikhae yahi aaina na jaane kya

dua ke phul ki KHushbu sa phailne wala

wo KHud mein DhunDhta tha gum-shuda na jaane kya

nahin hai kis ki nazar mein ufuq koi na koi

is aankh mein thi koi shai juda na jaane kya

tamam shahr mein gaDhe dhuwen ka manzar hai

likha hua tha yahan ja-ba-ja na jaane kya

wahi bichhaDte dilon ki faza-e-ashk-alud

wahi safar ki purana naya na jaane kya

nikal gaya hai KHalaon ki samt ai 'bani'

nawah-e-jaan se guzarta hua na jaane kya