din-bhar dasht-nawardi kar ke KHud pe riqqat tari ki

din-bhar dasht-navardī kar ke ḳhud pe riqqat taarī kī

ham ne apne dushman se bhī jaan se baḌh kar yaarī kī

us ne apne paas biThā kar ism-e-ḳhās kā vird kiyā

ramz mujhe ma.alūm na thī is tārīkī bedārī kī

miltī kab hai āsānī se dar-dar jaanā paḌtā hai

sāñbh ke maiñ ne rakh lī hai ye sab daulat ḳhuddārī kī

din-bhar ek faqīr ne tere vasl kī ḳhātir raqs kiyā

shab-bhar tere dīvāne ne hijr meñ girya-zārī kī

ġham ke musāfir-ḳhāne se ho kar be-zār zamāne se

darveshoñ ne dasht meñ jā kar rahne kī tayārī kī

siine se lagte hī ġham kā bojh utarne lagtā thā

thī maujūd zamāne meñ ik rasm ki pursa-dārī kī

sab dīvāne dekh ke mujh ko hairat se do-chār hue

sar pe jab dastār sajā.ī vahshat kī sardārī kī

jagah jagah pe ashk-fishānī saare kāġhaz giile haiñ

bāteñ bilkul sach lagtī haiñ ik majbūr likhārī kī

din-bhar dasht-nawardi kar ke KHud pe riqqat tari ki

hum ne apne dushman se bhi jaan se baDh kar yari ki

us ne apne pas biTha kar ism-e-KHas ka wird kiya

ramz mujhe malum na thi is tariki bedari ki

milti kab hai aasani se dar-dar jaana paDta hai

sanbh ke main ne rakh li hai ye sab daulat KHuddari ki

din-bhar ek faqir ne tere wasl ki KHatir raqs kiya

shab-bhar tere diwane ne hijr mein girya-zari ki

gham ke musafir-KHane se ho kar be-zar zamane se

darweshon ne dasht mein ja kar rahne ki tayari ki

sine se lagte hi gham ka bojh utarne lagta tha

thi maujud zamane mein ek rasm ki pursa-dari ki

sab diwane dekh ke mujh ko hairat se do-chaar hue

sar pe jab dastar sajai wahshat ki sardari ki

jagah jagah pe ashk-fishani sare kaghaz gile hain

baaten bilkul sach lagti hain ek majbur likhaari ki