din Dhala sham hui phul kahin lahrae

din Dhalā shaam huī phuul kahīñ lahrā.e

saañp yādoñ ke mahakte hue Dasne aa.e

vo kaḌī dhuup ke din vo tapish-e-rāh-e-vafā

vo savād-e-shab-e-gesū ke ghanere saa.e

daulat-e-tab-e-suḳhan-go hai amānat us kī

jab tirī chashm-e-suḳhan-sāz talab farmā.e

justujū-e-ġham-e-daurāñ ko ḳhirad niklī thī

ki junūñ ne ġham-e-jānāñ ke ḳhazīne paa.e

sab mujhe mashvara-e-tark-e-vafā dete haiñ

un kā iimā bhī ho shāmil to maza aa jaa.e

kyā kahūñ dil ne kahāñ saiñt ke rakkhā hai use

na kabhī bhūlne pā.ūñ na mujhe yaad aa.e

maiñ ne hāfiz kī tarah tai ye kiyā hai 'ābid'

ba.ad-azīñ mai na ḳhuram be-kaf-e-bazm-ārā.e

din Dhala sham hui phul kahin lahrae

sanp yaadon ke mahakte hue Dasne aae

wo kaDi dhup ke din wo tapish-e-rah-e-wafa

wo sawad-e-shab-e-gesu ke ghanere sae

daulat-e-tab-e-suKHan-go hai amanat us ki

jab teri chashm-e-suKHan-saz talab farmae

justuju-e-gham-e-dauran ko KHirad nikli thi

ki junun ne gham-e-jaanan ke KHazine pae

sab mujhe mashwara-e-tark-e-wafa dete hain

un ka ima bhi ho shamil to maza aa jae

kya kahun dil ne kahan saint ke rakkha hai use

na kabhi bhulne paun na mujhe yaad aae

main ne hafiz ki tarah tai ye kiya hai 'abid'

baad-azin mai na KHuram be-kaf-e-bazm-arae