din hua KHatm waqt-e-sham aaya

din huā ḳhatm vaqt-e-shām aaya

hijr meñ maut kā payām aaya

har ghaḌī lab pe un kā naam aaya

bekasī meñ yahī to kaam aaya

hai mohabbat meñ rāzdārī shart

lab tak un kā kabhī na naam aaya

shab ko va.ada hai un ke aane kā

kis musībat se vaqt-e-shām aaya

ġham nahīñ dil jo mil gayā un se

na sahī mere un ke kaam aaya

sunñe vaalā bayāñ hai vaa.iz kā

maiñ abhī pī ke ek jaam aaya

kyā mohabbat meñ ġhair kā shikva

dil jo apnā thā kab vo kaam aaya

vasl kā zikr sunte hī bole

phir zabāñ par vahī kalām aaya

ḳhum ke ḳhum ġhair kar ga.e ḳhālī

mere hisse meñ ek jaam aaya

harf-e-matlab na thā kahīñ marqūm

ḳhat bhī un kā barā.e naam aaya

ḳhuub piite pilāte ai zāhid

zohd-o-taqvā bhī koī kaam aaya

ek hālat se hijr meñ guzrī

farq koī na sub.h-o-shām aaya

kis bayābāñ meñ laa.ī hai vahshat

ai junūñ kaun ye maqām aaya

ab ye aalam hai nā-tavānī kā

lab pe naala bhī nā-tamām aaya

be-nishāñ ho ga.ī mirī turbat

is tarah kaun ḳhush-ḳhirām aaya

ibtidā thī vo ishq-o-ulfat kī

dil sā hamdard jis meñ kaam aaya

sharh-e-ġham kar sakā na mahshar meñ

sab ke āḳhir meñ merā naam aaya

chheḌ thī ye bhī aap ke ḳhat meñ

ġhair kā jo likhā salām aaya

rahne deñge na but haram meñ mujhe

dair se aaj phir payām aaya

dil se ummīd thī hameñ kyā kyā

vo bhī 'ishrat' unhīñ ke kaam aaya

din hua KHatm waqt-e-sham aaya

hijr mein maut ka payam aaya

har ghaDi lab pe un ka nam aaya

bekasi mein yahi to kaam aaya

hai mohabbat mein raazdari shart

lab tak un ka kabhi na nam aaya

shab ko wada hai un ke aane ka

kis musibat se waqt-e-sham aaya

gham nahin dil jo mil gaya un se

na sahi mere un ke kaam aaya

sunne wala bayan hai waiz ka

main abhi pi ke ek jam aaya

kya mohabbat mein ghair ka shikwa

dil jo apna tha kab wo kaam aaya

wasl ka zikr sunte hi bole

phir zaban par wahi kalam aaya

KHum ke KHum ghair kar gae KHali

mere hisse mein ek jam aaya

harf-e-matlab na tha kahin marqum

KHat bhi un ka barae nam aaya

KHub pite pilate ai zahid

zohd-o-taqwa bhi koi kaam aaya

ek haalat se hijr mein guzri

farq koi na subh-o-sham aaya

kis bayaban mein lai hai wahshat

ai junun kaun ye maqam aaya

ab ye aalam hai na-tawani ka

lab pe nala bhi na-tamam aaya

be-nishan ho gai meri turbat

is tarah kaun KHush-KHiram aaya

ibtida thi wo ishq-o-ulfat ki

dil sa hamdard jis mein kaam aaya

sharh-e-gham kar saka na mahshar mein

sab ke aaKHir mein mera nam aaya

chheD thi ye bhi aap ke KHat mein

ghair ka jo likha salam aaya

rahne denge na but haram mein mujhe

dair se aaj phir payam aaya

dil se ummid thi hamein kya kya

wo bhi 'ishrat' unhin ke kaam aaya