din mile raat mile subh mile sham mile

din mile raat mile sub.h mile shaam mile

ishq sādiq ho to taklīf meñ ārām mile

do kināre kabhī dariyā ke na mil pā.eñge

kaise phir ziist ke āġhāz se anjām mile

zindagī dard-e-mohabbat se sajā rakkhī hai

ghuT ke mar jā.ūñ jo dil ko mire ārām mile

nazm maiḳhāne kā qaa.em hai unhīñ se saaqī

tere ḳhum-ḳhāne meñ jo log tahī-jām mile

sab haiñ betāb tirī ek nazar kī ḳhātir

dekhiye kis ko mohabbat meñ ye in.aam mile

maiñ mohabbat meñ tire naam se aage na baḌhā

mujh ko is raah meñ har chand ka.ī naam mile

dushmanoñ se to kisī jurm kī paa.ī na sanad

dostoñ se mujhe ilzām hī ilzām mile

dard ko is liye siine se lagā rakkhā hai

had se baḌh jaa.e to kuchh jism ko ārām mile

apnī taqdīr pe vo naaz kare kyoñ na 'la.īq'

jis ko duniyā na mile aap kā paiġhām mile

din mile raat mile subh mile sham mile

ishq sadiq ho to taklif mein aaram mile

do kinare kabhi dariya ke na mil paenge

kaise phir zist ke aaghaz se anjam mile

zindagi dard-e-mohabbat se saja rakkhi hai

ghuT ke mar jaun jo dil ko mere aaram mile

nazm maiKHane ka qaem hai unhin se saqi

tere KHum-KHane mein jo log tahi-jam mile

sab hain betab teri ek nazar ki KHatir

dekhiye kis ko mohabbat mein ye inam mile

main mohabbat mein tere nam se aage na baDha

mujh ko is rah mein har chand kai nam mile

dushmanon se to kisi jurm ki pai na sanad

doston se mujhe ilzam hi ilzam mile

dard ko is liye sine se laga rakkha hai

had se baDh jae to kuchh jism ko aaram mile

apni taqdir pe wo naz kare kyon na 'laiq'

jis ko duniya na mile aap ka paigham mile