din raat ke dekhe hue manzar se alag hai

din raat ke dekhe hue manzar se alag hai

ye lamha to maujūd o mayassar se alag hai

maujeñ ki bagūle hoñ mire dil kā har ik rañg

sahrā hai judā aur samundar se alag hai

vo shai ki lage jis se mirī ruuh pe ye zaḳhm

vāqif hī nahīñ tū tire ḳhanjar se alag hai

poshīda nahīñ mujh se ye duniyā kī haqīqat

bāhar se mire saath hai andar se alag hai

ik rañg barastā hī rahā mujh pe agarche

ma.alūm thā vo mere muqaddar se alag hai

tujh ko nahīñ ma.alūm hue jis pe fidā ham

hai aur hī kuchh jo tire paikar se alag hai

us chashm-e-karam ne mujhe baḳhshā jo ḳhazīna

an-mol hai vo aur zar-o-gauhar se alag hai

us shaḳhs kī ulfat ne phir ik roz batāyā

qismat mirī dārā-o-sikandar se alag hai

din raat ke dekhe hue manzar se alag hai

ye lamha to maujud o mayassar se alag hai

maujen ki bagule hon mere dil ka har ek rang

sahra hai juda aur samundar se alag hai

wo shai ki lage jis se meri ruh pe ye zaKHm

waqif hi nahin tu tere KHanjar se alag hai

poshida nahin mujh se ye duniya ki haqiqat

bahar se mere sath hai andar se alag hai

ek rang barasta hi raha mujh pe agarche

malum tha wo mere muqaddar se alag hai

tujh ko nahin malum hue jis pe fida hum

hai aur hi kuchh jo tere paikar se alag hai

us chashm-e-karam ne mujhe baKHsha jo KHazina

an-mol hai wo aur zar-o-gauhar se alag hai

us shaKHs ki ulfat ne phir ek roz bataya

qismat meri dara-o-sikandar se alag hai