din-raat neta rahte hain apni jugaD mein

din-rāt netā rahte haiñ apnī jugāḌ meñ

un kī balā se desh chalā jaa.e bhaaḌ meñ

shurafā haiñ bā-asar haiñ magar fāqa-mast haiñ

kunDī talak hilegī na un ke kivāḌ meñ

maiñ chāhtā huuñ log hoñ logoñ ke pardā-posh

aur log saare rahte haiñ akhkhal pachhāḌ meñ

hālāt se nipaTne kā ham ko shu.ūr hai

ham kab kahāñ kisī se haiñ kam mār-dhāḌ meñ

ham ne bhī ḳhud ye soch ke dāḌhī rakhā.ī hai

ham bhī shikār kheleñge dāḌhī kī aaḌ meñ

vo bhī lañgoTī chhoḌ siyāsat meñ aa ga.e

sādhū bichāre rahte kahāñ tak pahāḌ meñ

ai shaiḳh-e-mohtaram tumheñ jin kī talāsh hai

vo bevaqūf tum ko mileñge tihāḌ meñ

'dilkash' ye ta.ane suntā huuñ begam se raat din

bachchoñ ko mere tum ne bigāḌā hai laaD meñ

din-raat neta rahte hain apni jugaD mein

un ki bala se desh chala jae bhaD mein

shurafa hain ba-asar hain magar faqa-mast hain

kunDi talak hilegi na un ke kiwaD mein

main chahta hun log hon logon ke parda-posh

aur log sare rahte hain akhkhal pachhaD mein

haalat se nipaTne ka hum ko shuur hai

hum kab kahan kisi se hain kam mar-dhaD mein

hum ne bhi KHud ye soch ke daDhi rakhai hai

hum bhi shikar khelenge daDhi ki aaD mein

wo bhi langoTi chhoD siyasat mein aa gae

sadhu bichaare rahte kahan tak pahaD mein

ai shaiKH-e-mohtaram tumhein jin ki talash hai

wo bewaquf tum ko milenge tihaD mein

'dilkash' ye tane sunta hun begam se raat din

bachchon ko mere tum ne bigaDa hai laD mein