din wasl ke ranj-e-shab-e-gham bhul gae hain

din vasl ke ranj-e-shab-e-ġham bhuul ga.e haiñ

ye ḳhush haiñ ki apne ta.iiñ ham bhuul ga.e haiñ

un va.ada-faroshoñ se kyā kījiye shikva

khā khā ke mire sar kī qasam bhuul ga.e haiñ

jis din se ga.e apnī ḳhabar tak nahīñ bhejī

shāyad hameñ yārāna-e-adam bhuul ga.e haiñ

kaaTī haiñ mahīnoñ hī tirī yaad meñ rāteñ

ġhaflat meñ tujhe gar koī dam bhuul ga.e haiñ

yā rāhat-o-ranj ab hai musāvāt hamīñ ko

yā aap hī kuchh tarz-e-sitam bhuul ga.e haiñ

kuchh hosh Thikāne hoñ to leñ naam kisī kā

ham de ke kahīñ dil kī raqam bhuul ga.e haiñ

go barsar-e-parḳhāsh hai 'masrūr' se tū ab

kyā us ko tire lutf-o-karam bhuul ga.e haiñ

din wasl ke ranj-e-shab-e-gham bhul gae hain

ye KHush hain ki apne tain hum bhul gae hain

un wada-faroshon se kya kijiye shikwa

kha kha ke mere sar ki qasam bhul gae hain

jis din se gae apni KHabar tak nahin bheji

shayad hamein yarana-e-adam bhul gae hain

kaTi hain mahinon hi teri yaad mein raaten

ghaflat mein tujhe gar koi dam bhul gae hain

ya rahat-o-ranj ab hai musawat hamin ko

ya aap hi kuchh tarz-e-sitam bhul gae hain

kuchh hosh Thikane hon to len nam kisi ka

hum de ke kahin dil ki raqam bhul gae hain

go barsar-e-parKHash hai 'masrur' se tu ab

kya us ko tere lutf-o-karam bhul gae hain