diye hain zaKHm zamane ne be-shumar mujhe

diye haiñ zaḳhm zamāne ne be-shumār mujhe

zahe-nasīb milā dil bhī dāġh-dār mujhe

sukūn de na sake dasht-o-kohsār mujhe

milā na rū-e-zamīñ par kabhī qarār mujhe

na aa sakā tire va.ada pe e.atibār mujhe

hai sirf ab to qayāmat kā intizār mujhe

guloñ ke pyaar ne uljhā diyā hai kāñToñ meñ

chaman meñ denī paḌī qīmat-e-bahār mujhe

kahāñ se aaya kahāñ jā.ūñgā ḳhudā jaane

ḳhud apnī yaad satātī hai baar baar mujhe

kuredte rahe har ek zaḳhm-e-dil merā

tasallī dene ko aa.e the ġham-gusār mujhe

ye zindagī bhī mire bas meñ ab nahīñ 'sālik'

nahīñ hai jaan bhī dene kā iḳhtiyār mujhe

diye hain zaKHm zamane ne be-shumar mujhe

zahe-nasib mila dil bhi dagh-dar mujhe

sukun de na sake dasht-o-kohsar mujhe

mila na ru-e-zamin par kabhi qarar mujhe

na aa saka tere wada pe eatibar mujhe

hai sirf ab to qayamat ka intizar mujhe

gulon ke pyar ne uljha diya hai kanTon mein

chaman mein deni paDi qimat-e-bahaar mujhe

kahan se aaya kahan jaunga KHuda jaane

KHud apni yaad satati hai bar bar mujhe

kuredte rahe har ek zaKHm-e-dil mera

tasalli dene ko aae the gham-gusar mujhe

ye zindagi bhi mere bas mein ab nahin 'salik'

nahin hai jaan bhi dene ka iKHtiyar mujhe