diye kitne andheri umr ke raston mein aate hain

diye kitne añdherī umr ke rastoñ meñ aate haiñ

magar kuchh vasf haiñ jo āḳhirī barsoñ meñ aate haiñ

charāġh-e-intizār aisī nigahbānī ke aalam meñ

muñDeroñ par nahīñ jalte to phir palkoñ meñ aate haiñ

bahut āb-o-havā kā qarz vājib hai magar ham par

ye ghar jab tañg ho jaate haiñ phir galiyoñ meñ aate haiñ

miyān-e-iḳhtiyār-o-e'tibār ik hadd-e-fāsil hai

jo hāthoñ meñ nahīñ aate vo phir bāhoñ meñ aate haiñ

koī shai mushtarak hai phuul kāñToñ aur sho.aloñ meñ

jo dāman se lipaTte haiñ garebānoñ meñ aate haiñ

kushāda dast-o-bāzū ko jo patjhaḌ meñ bhī rakhte haiñ

parinde agle mausam ke unhī peḌoñ meñ aate haiñ

diye kitne andheri umr ke raston mein aate hain

magar kuchh wasf hain jo aaKHiri barson mein aate hain

charagh-e-intizar aisi nigahbani ke aalam mein

munDeron par nahin jalte to phir palkon mein aate hain

bahut aab-o-hawa ka qarz wajib hai magar hum par

ye ghar jab tang ho jate hain phir galiyon mein aate hain

miyan-e-iKHtiyar-o-e'tibar ek hadd-e-fasil hai

jo hathon mein nahin aate wo phir bahon mein aate hain

koi shai mushtarak hai phul kanTon aur shoalon mein

jo daman se lipaTte hain garebanon mein aate hain

kushada dast-o-bazu ko jo patjhaD mein bhi rakhte hain

parinde agle mausam ke unhi peDon mein aate hain