diye the zaKHm mujhe jo mere muqaddar ne

diye the zaḳhm mujhe jo mire muqaddar ne

shifā dī un ko kisī kī nazar ke nashtar ne

ga.e jo sair ko kal sāhil-e-samundar par

to pair chuum ke kī peshvā.ī sāgar ne

thā iḳhtiyār nahīñ dil pe varna kyoñ detā

ye kyā huā ki liyā bhī to ik sitamgar ne

ḳhirām-e-nāz-e-dil-ārā pe jab nazar Thahrī

dabā lī dāñtoñ meñ uñglī vahīñ sanobar ne

kiyā kisī ko to gumrāh dīn-e-haq se aur

kisī ko chhoḌ diyā raah meñ hī rahbar ne

gila thā aap ko ham baat kyoñ nahīñ karte

suneñ jo kah na sake kah diyā vo jhāñjhar ne

hai asp-e-tez-qadam par savār 'umr-e-ins

subuk-ḳhirāmī pe shikva kiyā hai sarsar ne

diye the zaKHm mujhe jo mere muqaddar ne

shifa di un ko kisi ki nazar ke nashtar ne

gae jo sair ko kal sahil-e-samundar par

to pair chum ke ki peshwai sagar ne

tha iKHtiyar nahin dil pe warna kyon deta

ye kya hua ki liya bhi to ek sitamgar ne

KHiram-e-naz-e-dil-ara pe jab nazar Thahri

daba li danton mein ungli wahin sanobar ne

kiya kisi ko to gumrah din-e-haq se aur

kisi ko chhoD diya rah mein hi rahbar ne

gila tha aap ko hum baat kyon nahin karte

sunen jo kah na sake kah diya wo jhanjhar ne

hai asp-e-tez-qadam par sawar 'umr-e-ins

subuk-KHirami pe shikwa kiya hai sarsar ne