do aankhon ko chaar kiya ja sakta hai

do āñkhoñ ko chaar kiyā jā saktā hai

sapnoñ ko sākār kiyā jā saktā hai

duniyā kā dīdār kiyā jā saktā hai

āñkhoñ ko sansār kiyā jā saktā

habs-e-anā meñ in ko zaa.e.a mat kar jaañ

in lamhoñ meñ pyaar kiyā jā saktā hai

tujh se jitnā ishq kiyā hai utne meñ

duniyā kā uddhār kiyā jā saktā hai

ham marzī se Duube haiñ varna tujh ko

āsānī se paar kiyā jā saktā hai

ḳhushiyoñ kī maanā kuchh qillat hai lekin

ġham kā to ambār kiyā jā saktā hai

paar bhī ho saktā hai nafrat kā dariyā

ulfat ko patvār kiyā jā saktā hai

ishq ye sunte haiñ hotā hai bahut mushkil

haañ lekin sarkār kiyā jā saktā hai

mar jaanā hī ek tarīqa thoḌī hai

jiinā bhī dushvār kiyā jā saktā hai

yādeñ hī aġhyār raheñgī saat janm

ḳhalvat ko to yaar kiyā jā saktā hai

bachche ab ye jaan ga.e haiñ zid karke

būḌhoñ ko lāchār kiyā jā saktā hai

do aankhon ko chaar kiya ja sakta hai

sapnon ko sakar kiya ja sakta hai

duniya ka didar kiya ja sakta hai

aankhon ko sansar kiya ja sakta

habs-e-ana mein in ko zaea mat kar jaan

in lamhon mein pyar kiya ja sakta hai

tujh se jitna ishq kiya hai utne mein

duniya ka uddhaar kiya ja sakta hai

hum marzi se Dube hain warna tujh ko

aasani se par kiya ja sakta hai

KHushiyon ki mana kuchh qillat hai lekin

gham ka to ambar kiya ja sakta hai

par bhi ho sakta hai nafrat ka dariya

ulfat ko patwar kiya ja sakta hai

ishq ye sunte hain hota hai bahut mushkil

han lekin sarkar kiya ja sakta hai

mar jaana hi ek tariqa thoDi hai

jina bhi dushwar kiya ja sakta hai

yaaden hi aghyar rahengi sat janm

KHalwat ko to yar kiya ja sakta hai

bachche ab ye jaan gae hain zid karke

buDhon ko lachaar kiya ja sakta hai