do bund ko shabnam ki gulzar taraste hain

do buuñd ko shabnam kī gulzār taraste haiñ

bādal tirī rahmat ke jangal pe baraste haiñ

do lafz mohabbat ke do lafz tasallī ke

ahbāb-o-a.izzā sab sunñe ko taraste haiñ

har moḌ pe baiThe haiñ ifrīt dahan khole

ye kaun sī manzil hai ye kaun se raste haiñ

jin logoñ se raunaq thī us shahr-e-nigārāñ kī

vo shahr-e-ḳhamoshāñ kī ḳhāmoshī meñ baste haiñ

sho.ale kabhī holī ke uThte haiñ rag-e-jāñ se

bādal kabhī sāvan ke āñkhoñ se baraste haiñ

'rif.at' ye ḳhamoshī bhī hālāt kī sūrat hai

be-vaj.h ġharīboñ par kyoñ aap garajte haiñ

do bund ko shabnam ki gulzar taraste hain

baadal teri rahmat ke jangal pe baraste hain

do lafz mohabbat ke do lafz tasalli ke

ahbab-o-aizza sab sunne ko taraste hain

har moD pe baiThe hain ifrit dahan khole

ye kaun si manzil hai ye kaun se raste hain

jin logon se raunaq thi us shahr-e-nigaran ki

wo shahr-e-KHamoshan ki KHamoshi mein baste hain

shoale kabhi holi ke uThte hain rag-e-jaan se

baadal kabhi sawan ke aankhon se baraste hain

'rifat' ye KHamoshi bhi haalat ki surat hai

be-wajh gharibon par kyon aap garajte hain