do dil wo sang sang dhaDakte hain aaj bhi

do dil vo sang sang dhaḌakte haiñ aaj bhī

khiḌkī se chorī chorī vo takte haiñ aaj bhī

kahtā hai kaun 'ishq ke lahje badal ga.e

kangan kalā.iyoñ meñ khanakte haiñ aaj bhī

kartā hai koī sāzisheñ varna yūñhī nahīñ

āñchal ghaḌī meñ ik do aTakte haiñ aaj bhī

itnī hai paak 'ishq kī ye dāstāñ suno

aane meñ vo qarīb jhijakte haiñ aaj bhī

ḳhvāboñ se ab talak tirī sūrat nahīñ ga.ī

uTh uTh ke rāt-bhar ko sisakte haiñ aaj bhī

nīchī nigāh uThtī hai aate hī 'nūr' ke

yā'nī sharīf log bahakte haiñ aaj bhī

do dil wo sang sang dhaDakte hain aaj bhi

khiDki se chori chori wo takte hain aaj bhi

kahta hai kaun 'ishq ke lahje badal gae

kangan kalaiyon mein khanakte hain aaj bhi

karta hai koi sazishen warna yunhi nahin

aanchal ghaDi mein ek do aTakte hain aaj bhi

itni hai pak 'ishq ki ye dastan suno

aane mein wo qarib jhijakte hain aaj bhi

KHwabon se ab talak teri surat nahin gai

uTh uTh ke raat-bhar ko sisakte hain aaj bhi

nichi nigah uThti hai aate hi 'nur' ke

ya'ni sharif log bahakte hain aaj bhi