do-ghaDi qafila-e-dard ko Thahraya hai

do-ghaḌī qāfila-e-dard ko Thahrāyā hai

baat ye hai ki mujhe terā ḳhayāl aayā hai

ik na.e daur kī āvāz samajh kar mujh ko

asr-e-hāzir ne baḌe pyaar se apnāyā hai

kitnī rātoñ ko tire dard kī daulat baḳhshī

kitnī rāhoñ ko tire naam se chamkāyā hai

dil kī galiyoñ se guzarte hue dekhā hai tujhe

yā kisī yaad kī dīvār tale paayā hai

mausam-e-gul bhī jab aayā hai to aate aate

rahguzāroñ se kaḌī dhuup uThā laayā hai

tujh ko pā kar tujhe khone kī tamanna kī hai

haa.e kis moḌ pe hālāt ne pahuñchāyā hai

vaqt bichhḌā hai to paiġhām-e-vafā chhoḌ gayā

chāñd Duubā hai to siine meñ utar aayā hai

jaise uktā ke mah-o-mehr ke hangāmoñ se

aaj phir koī añdheroñ meñ chalā aayā hai

us ne mujh se bhī sivā pyaar kiyā hai mujh se

umr-bhar jis ne mujhe pyaar ko tarsāyā hai

vaqt kī tez-ravī dekh ke yuuñ lagtā hai

jaise maqtal se koī jaan bachā laayā hai

zehn meñ koī darīcha to khulā hai 'jāmī'

dasht-e-hijrāñ meñ koī ḳhvāb to lahrāyā hai

do-ghaDi qafila-e-dard ko Thahraya hai

baat ye hai ki mujhe tera KHayal aaya hai

ek nae daur ki aawaz samajh kar mujh ko

asr-e-hazir ne baDe pyar se apnaya hai

kitni raaton ko tere dard ki daulat baKHshi

kitni rahon ko tere nam se chamkaya hai

dil ki galiyon se guzarte hue dekha hai tujhe

ya kisi yaad ki diwar tale paya hai

mausam-e-gul bhi jab aaya hai to aate aate

rahguzaron se kaDi dhup uTha laya hai

tujh ko pa kar tujhe khone ki tamanna ki hai

hae kis moD pe haalat ne pahunchaya hai

waqt bichhDa hai to paigham-e-wafa chhoD gaya

chand Duba hai to sine mein utar aaya hai

jaise ukta ke mah-o-mehr ke hangamon se

aaj phir koi andheron mein chala aaya hai

us ne mujh se bhi siwa pyar kiya hai mujh se

umr-bhar jis ne mujhe pyar ko tarsaya hai

waqt ki tez-rawi dekh ke yun lagta hai

jaise maqtal se koi jaan bacha laya hai

zehn mein koi daricha to khula hai 'jami'

dasht-e-hijran mein koi KHwab to lahraya hai