do pal jo wo baat kar gai hai

do pal jo vo baat kar ga.ī hai

sadiyoñ kī thakan utar ga.ī hai

zinda kiye jis ne ḳhvāb mere

ḳhvāboñ meñ vo raat mar ga.ī hai

manzar meñ ye vus.ateñ kahāñ thiiñ

merī hī nazar bikhar ga.ī hai

jhoñke kī misāl aa.egā vo

ḳhushbū kī tarah ḳhabar ga.ī hai

lā.egī sameT kar usī ko

ik ḳhālī nigāh ghar ga.ī hai

dil kitnā hasīn hogā us kā

jo mez pe phuul dhar ga.ī hai

sochā thā to zehn kam paḌā thā

dekhā hai to aañkh bhar ga.ī hai

do pal jo wo baat kar gai hai

sadiyon ki thakan utar gai hai

zinda kiye jis ne KHwab mere

KHwabon mein wo raat mar gai hai

manzar mein ye wusaten kahan thin

meri hi nazar bikhar gai hai

jhonke ki misal aaega wo

KHushbu ki tarah KHabar gai hai

laegi sameT kar usi ko

ek KHali nigah ghar gai hai

dil kitna hasin hoga us ka

jo mez pe phul dhar gai hai

socha tha to zehn kam paDa tha

dekha hai to aankh bhar gai hai