do roz mein shabab ka aalam guzar gaya

do roz meñ shabāb kā aalam guzar gayā

gulshan meñ ek phuul khilā aur bikhar gayā

uḌne lagī hai rāh-e-tamannā meñ dhuul sī

ye kis ke saath mausam-e-armāñ guzar gayā

dil meñ kisī bhī vahm-o-gumāñ kā guzar nahīñ

muñh phernā kisī kā baḌā kaam kar gayā

ab chāhtā huuñ lazzat-e-dard-e-firāq-e-yār

dil to har ek aish-e-zamāna se bhar gayā

bīmār-e-ġham ne toḌ diyā dam ḳhushī ke saath

un kā ḳhayāl maut bhī āsān kar gayā

'nāshād' aa gayā dil-e-betāb ko qarār

ik āshnā bhī merī vafā se mukar gayā

do roz mein shabab ka aalam guzar gaya

gulshan mein ek phul khila aur bikhar gaya

uDne lagi hai rah-e-tamanna mein dhul si

ye kis ke sath mausam-e-arman guzar gaya

dil mein kisi bhi wahm-o-guman ka guzar nahin

munh pherna kisi ka baDa kaam kar gaya

ab chahta hun lazzat-e-dard-e-firaq-e-yar

dil to har ek aish-e-zamana se bhar gaya

bimar-e-gham ne toD diya dam KHushi ke sath

un ka KHayal maut bhi aasan kar gaya

'nashad' aa gaya dil-e-betab ko qarar

ek aashna bhi meri wafa se mukar gaya