donon aalam se nirali ishq ki sarkar hai

donoñ aalam se nirālī ishq kī sarkār hai

hosh se jo be-ḳhabar hai vo yahāñ hoshiyār hai

ro rahe haiñ ḳhuun ke aañsū mire zaḳhm-e-jigar

dil mire pahlū meñ hai yā dīda-e-ḳhūñ-bār hai

aa gayā ahd-e-ḳhizāñ ruḳhsat huī fasl-e-bahār

shāḳh-e-gul par nauhagar phir andalīb-e-zār hai

aañkh milnā thā ki ruḳhsat ho ga.e sabr-o-qarār

kyā ise dīdār kahte haiñ yahī dīdār hai

hijr kī rāteñ mirī ho jaa.eñ ghaḌiyāñ vasl kī

ye tumheñ āsān hai mere liye dushvār hai

allah allah mo.ajiza hai kyā sharāb-e-husn kā

jo tirī mahfil meñ hai vo be-piye sarshār hai

kyoñ na ai 'fāzil' karūñ maiñ phir parastish husn kī

dekhtā huuñ zarra zarra ālam-e-anvār hai

donon aalam se nirali ishq ki sarkar hai

hosh se jo be-KHabar hai wo yahan hoshiyar hai

ro rahe hain KHun ke aansu mere zaKHm-e-jigar

dil mere pahlu mein hai ya dida-e-KHun-bar hai

aa gaya ahd-e-KHizan ruKHsat hui fasl-e-bahaar

shaKH-e-gul par nauhagar phir andalib-e-zar hai

aankh milna tha ki ruKHsat ho gae sabr-o-qarar

kya ise didar kahte hain yahi didar hai

hijr ki raaten meri ho jaen ghaDiyan wasl ki

ye tumhein aasan hai mere liye dushwar hai

allah allah moajiza hai kya sharab-e-husn ka

jo teri mahfil mein hai wo be-piye sarshaar hai

kyon na ai 'fazil' karun main phir parastish husn ki

dekhta hun zarra zarra aalam-e-anwar hai