donon gharon ka lutf judagana mil gaya

donoñ gharoñ kā lutf judāgāna mil gayā

ka.abe se ham chale the ki but-ḳhāna mil gayā

saaqī se yuuñ subūt-e-karīmāna mil gayā

paimāna maiñ ne māñgā thā mai-ḳhāna mil gayā

dil kyuuñ na ham faroḳht kareñ is yaqīn par

qīmat bhī ab milegī jo bai.āna mil gayā

saaqī kī chashm-e-mast idhar aaj uTh ga.ī

ham ko hamāre zarf kā paimāna mil gayā

karnī paḌī na aur kahīñ justujū mujhe

ka.abe hī ke hudūd meñ but-ḳhāna mil gayā

mahshar meñ dekh kar unheñ yuuñ shaad ho ga.e

goyā hameñ najāt kā parvāna mil gayā

mil kar bhī jal gayā ki bachā ye na pūchhiye

itnā huā ki sham.a se parvāna mil gayā

ab dar-ba-dar kī Thokareñ khāne se kyā ġharaz

mujh ko ḳhudā-e-ka.aba-o-but-ḳhāna mil gayā

allāh re chashm-e-sāqī-e-mahfil kā lutf-e-ḳhās

sab yuuñ hī rah ga.e mujhe paimāna mil gayā

vo ḳhat meñ likh rahe haiñ tirī āfiyat nahīñ

mujh ko adam kī raah kā parvāna mil gayā

ai sāilkān-e-jāda-e-irfāñ baḌhe chalo

but-ḳhāna mil gayā to ḳhudā-ḳhāna mil gayā

tauqīr-e-ishq ḳhaak uḌāne se baḌh ga.ī

ye hai ġhalat ki ḳhaak meñ dīvāna mil gayā

paa.e uruuj kyuuñ na hamārī farotanī

phūlā phalā vo ḳhaak meñ jo daana mil gayā

josh-e-junūñ ke vāste ab kuchh na chāhiye

vīrāne kī talāsh thī vīrāna mil gayā

paimāna-o-subū kī zarūrat nahīñ rahī

mujh ko mizāj-e-sāqī-e-mai-ḳhāna mil gayā

marqad se kushtagān-e-mohabbat nikal chuke

ab hashr tak ke vāste kāshāna mil gayā

ma.alūm ham ne kar liye asrār-e-husn-o-ishq

taqdīr se agar koī dīvāna mil gayā

rakh lī ḳhudā-e-ishq ne josh-e-junūñ kī sharm

ghar se nikalte hī mujhe vīrāna mil gayā

vo kah ga.e ki phir koī tūfān uThā.e

ai 'nūh' mujh ko shaġhl-e-qadīmāna mil gayā

donon gharon ka lutf judagana mil gaya

kabe se hum chale the ki but-KHana mil gaya

saqi se yun subut-e-karimana mil gaya

paimana main ne manga tha mai-KHana mil gaya

dil kyun na hum faroKHt karen is yaqin par

qimat bhi ab milegi jo baiana mil gaya

saqi ki chashm-e-mast idhar aaj uTh gai

hum ko hamare zarf ka paimana mil gaya

karni paDi na aur kahin justuju mujhe

kabe hi ke hudud mein but-KHana mil gaya

mahshar mein dekh kar unhen yun shad ho gae

goya hamein najat ka parwana mil gaya

mil kar bhi jal gaya ki bacha ye na puchhiye

itna hua ki shama se parwana mil gaya

ab dar-ba-dar ki Thokaren khane se kya gharaz

mujh ko KHuda-e-kaba-o-but-KHana mil gaya

allah re chashm-e-saqi-e-mahfil ka lutf-e-KHas

sab yun hi rah gae mujhe paimana mil gaya

wo KHat mein likh rahe hain teri aafiyat nahin

mujh ko adam ki rah ka parwana mil gaya

ai sailkan-e-jada-e-irfan baDhe chalo

but-KHana mil gaya to KHuda-KHana mil gaya

tauqir-e-ishq KHak uDane se baDh gai

ye hai ghalat ki KHak mein diwana mil gaya

pae uruj kyun na hamari farotani

phula phala wo KHak mein jo dana mil gaya

josh-e-junun ke waste ab kuchh na chahiye

virane ki talash thi virana mil gaya

paimana-o-subu ki zarurat nahin rahi

mujh ko mizaj-e-saqi-e-mai-KHana mil gaya

marqad se kushtagan-e-mohabbat nikal chuke

ab hashr tak ke waste kashana mil gaya

malum hum ne kar liye asrar-e-husn-o-ishq

taqdir se agar koi diwana mil gaya

rakh li KHuda-e-ishq ne josh-e-junun ki sharm

ghar se nikalte hi mujhe virana mil gaya

wo kah gae ki phir koi tufan uThae

ai 'nuh' mujh ko shaghl-e-qadimana mil gaya