donon jahan mein mujhko jhukaya nahin gaya

donoñ jahāñ meñ mujh ko jhukāyā nahīñ gayā

sar se mire buzurgoñ kā saaya nahīñ gayā

siine meñ mere kaisī tajallī ye dafn hai

jo aag se bhī mujh ko jalāyā nahīñ gayā

dekhā jo maiñ ne sach ko ziyāda qarīb se

phir chehra us kā mujh se banāyā nahīñ gayā

hairat meñ paḌ ga.ī hai ye bīnā.ī dekh kar

manzar jo is jahāñ ko dikhāyā nahīñ gayā

mere ḳhilāf jaao to pahle ye sochnā

bin paanī machhliyoñ ko jilāyā nahīñ gayā

ye dushmanī to yaar kisī kaam kī nahīñ

ik yaar tak Thikāne lagāyā nahīñ gayā

ḳhūn-e-husain aaj bhī hai merī aañkh meñ

ḳhūn-e-husain mujh se bhulāyā nahīñ gayā

duniyā se khelnā to bas ik shauq hai mirā

is shauq meñ kisī ko harāyā nahīñ gayā

hairān huuñ maiñ yaar ki vo sab ke saath hai

jis se kisī kā saath nibhāyā nahīñ gayā

tum to batā rahe the hameñ apne man kī baat

ham se to apnā haal batāyā nahīñ gayā

maiñ bevafā nahīñ huuñ magar thoḌā saḳht huuñ

lekin tirī samajh meñ jo aayā nahīñ gayā

ham hijratoñ ke maare hue ḳhush-nasīb log

ham se koī bhī rishta nibhāyā nahīñ gayā

parvardigār tū ne ye kaise banā diyā

paanī meñ ham se rasta banāyā nahīñ gayā

kyā maut kī bisāt hai jo sāmnā kare

'mas'ūd' ko kisī se hilāyā nahīñ gayā

donon jahan mein mujh ko jhukaya nahin gaya

sar se mere buzurgon ka saya nahin gaya

sine mein mere kaisi tajalli ye dafn hai

jo aag se bhi mujh ko jalaya nahin gaya

dekha jo main ne sach ko ziyaada qarib se

phir chehra us ka mujh se banaya nahin gaya

hairat mein paD gai hai ye binai dekh kar

manzar jo is jahan ko dikhaya nahin gaya

mere KHilaf jao to pahle ye sochna

bin pani machhliyon ko jilaya nahin gaya

ye dushmani to yar kisi kaam ki nahin

ek yar tak Thikane lagaya nahin gaya

KHun-e-husain aaj bhi hai meri aankh mein

KHun-e-husain mujh se bhulaya nahin gaya

duniya se khelna to bas ek shauq hai mera

is shauq mein kisi ko haraya nahin gaya

hairan hun main yar ki wo sab ke sath hai

jis se kisi ka sath nibhaya nahin gaya

tum to bata rahe the hamein apne man ki baat

hum se to apna haal bataya nahin gaya

main bewafa nahin hun magar thoDa saKHt hun

lekin teri samajh mein jo aaya nahin gaya

hum hijraton ke mare hue KHush-nasib log

hum se koi bhi rishta nibhaya nahin gaya

parwardigar tu ne ye kaise bana diya

pani mein hum se rasta banaya nahin gaya

kya maut ki bisat hai jo samna kare

'mas'ud' ko kisi se hilaya nahin gaya