donon mein thi hawas ki mohabbat to thi nahin

donoñ meñ thī havas ki mohabbat to thī nahīñ

ya.anī vafā kī un ko zarūrat to thī nahīñ

achchhā to chāhtī thiiñ zamāne se tum mujhe

lab par kabhī tumhāre shikāyat to thī nahīñ

haañ le ga.ī vo tum ko pareshānī kyoñ bhalā

dil merā thā kisī kī amānat to thī nahīñ

sīkhā hai aap hī se ki muñh-toḌ do javāb

ghar meñ hamāre aisī rivāyat to thī nahīñ

yūñhī vo khelte the khilaunā thā un kā bas

ya.anī ki un ko merī zarūrat to thī nahīñ

tum ho jahāñ pe us ke bhī laa.eq ho tum kaho

ya.anī tumhārī apnī vo mehnat to thī nahīñ

majrūh thā maiñ apnoñ kī bātoñ se ab bhī huuñ

hañstā huuñ ab bhī rone kī aadat to thī nahīñ

ham hī rahe sharīf hidāyat kī raah par

un logoñ meñ zarā sī sharāfat to thī nahīñ

vo varzishoñ ke shauq meñ sajde kiyā kiye

dil meñ ḳhudā kā ḳhauf ibādat to thī nahīñ

ab kyoñ karo kisī se muravvat jahān meñ

logoñ ko bhī tumhāre muravvat to thī nahīñ

bas naam ye baḌe the adab kī bisāt par

apne kiye pe un ko nadāmat to thī nahīñ

sach bolne kī ḳhū mujhe virse meñ hai milī

merī kisī se koī adāvat to thī nahīñ

hañs kar ke jī rahe the balāoñ ke daur meñ

'irshād' apne qalb ko rāhat to thī nahīñ

donon mein thi hawas ki mohabbat to thi nahin

yani wafa ki un ko zarurat to thi nahin

achchha to chahti thin zamane se tum mujhe

lab par kabhi tumhaare shikayat to thi nahin

han le gai wo tum ko pareshani kyon bhala

dil mera tha kisi ki amanat to thi nahin

sikha hai aap hi se ki munh-toD do jawab

ghar mein hamare aisi riwayat to thi nahin

yunhi wo khelte the khilauna tha un ka bas

yani ki un ko meri zarurat to thi nahin

tum ho jahan pe us ke bhi laeq ho tum kaho

yani tumhaari apni wo mehnat to thi nahin

majruh tha main apnon ki baaton se ab bhi hun

hansta hun ab bhi rone ki aadat to thi nahin

hum hi rahe sharif hidayat ki rah par

un logon mein zara si sharafat to thi nahin

wo warzishon ke shauq mein sajde kiya kiye

dil mein KHuda ka KHauf ibaadat to thi nahin

ab kyon karo kisi se murawwat jahan mein

logon ko bhi tumhaare murawwat to thi nahin

bas nam ye baDe the adab ki bisat par

apne kiye pe un ko nadamat to thi nahin

sach bolne ki KHu mujhe wirse mein hai mili

meri kisi se koi adawat to thi nahin

hans kar ke ji rahe the balaon ke daur mein

'irshad' apne qalb ko rahat to thi nahin