donon taraf hi barson ye silsile rahe the

donoñ taraf hī barsoñ ye silsile rahe the

kuchh vo the bad-gumāñ se kuchh ham khiñche rahe the

jin ko mire junūñ se kuchh vāsta nahīñ thā

muḌ muḌ ke merī jānib kyuuñ dekhte rahe the

tujh par ḳhudā kī rahmat ai dil hai ye haqīqat

jab tak na thā tirā ġham ham chain se rahe the

vo gulshan-e-mohabbat tārāj ho gayā kyā

kal tak jo ḳhūn-e-dil se ham sīñchte rahe the

ham ko tabāh kar ke kitne sukūn se haiñ

ham muztarib hamesha jin ke liye rahe the

dekhā jo aaj un ko hairān rah ga.e sab

kyā kyā na log ham ko ilzām de rahe the

aao ki ittifāqan tum bhī ho aaj tanhā

ham bhī hujūm-e-ġham meñ aksar ghire rahe the

kyā kyā ḳhayāl aa.e firdaus-e-hosh ban kar

kitne hasīñ azā.em dil meñ chhupe rahe the

vo din bhī yaad haiñ jab ye haal thā ki ham par

hañstī rahī thī duniyā ham dekhte rahe the

itnā to yaad hai jab vo ho rahe the ruḳhsat

tā-der dil hī dil meñ kuchh sochte rahe the

hairān huuñ ki un ko kyā ho gayā hai jaane

sāhil se jo musalsal āvāz de rahe the

ik inqalāb āḳhir aa hī gayā jahāñ meñ

sotī rahī thī duniyā ham jāgte rahe the

lo dekh lo haiñ mere qadmoñ meñ sar-ba-sajda

ye but ki jin ko kal tak sab pūjte rahe the

guzre the ham bhī 'rāhī' ik maqtal-e-vafā se

kuchh log chal base the kuchh saañs le rahe the

donon taraf hi barson ye silsile rahe the

kuchh wo the bad-guman se kuchh hum khinche rahe the

jin ko mere junun se kuchh wasta nahin tha

muD muD ke meri jaanib kyun dekhte rahe the

tujh par KHuda ki rahmat ai dil hai ye haqiqat

jab tak na tha tera gham hum chain se rahe the

wo gulshan-e-mohabbat taraj ho gaya kya

kal tak jo KHun-e-dil se hum sinchte rahe the

hum ko tabah kar ke kitne sukun se hain

hum muztarib hamesha jin ke liye rahe the

dekha jo aaj un ko hairan rah gae sab

kya kya na log hum ko ilzam de rahe the

aao ki ittifaqan tum bhi ho aaj tanha

hum bhi hujum-e-gham mein aksar ghire rahe the

kya kya KHayal aae firdaus-e-hosh ban kar

kitne hasin azaem dil mein chhupe rahe the

wo din bhi yaad hain jab ye haal tha ki hum par

hansti rahi thi duniya hum dekhte rahe the

itna to yaad hai jab wo ho rahe the ruKHsat

ta-der dil hi dil mein kuchh sochte rahe the

hairan hun ki un ko kya ho gaya hai jaane

sahil se jo musalsal aawaz de rahe the

ek inqalab aaKHir aa hi gaya jahan mein

soti rahi thi duniya hum jagte rahe the

lo dekh lo hain mere qadmon mein sar-ba-sajda

ye but ki jin ko kal tak sab pujte rahe the

guzre the hum bhi 'rahi' ek maqtal-e-wafa se

kuchh log chal base the kuchh sans le rahe the