dost bhi the us gali mein dushmanon ke sath-sath

dost bhī the us galī meñ dushmanoñ ke sāth-sāth

phuul bhī barse the mujh par pattharoñ ke sāth-sāth

ab kahāñ ḳhvāb-o-ḳhayāl o ḳhāl-o-ḳhad pahle se haiñ

kis qadar badlā huuñ maiñ calendaroñ ke sāth-sāth

ab na-jāne mujh ko le jaa.eñ kahāñ aañsū mire

ab to ik lambā safar hai pāniyoñ ke sāth-sāth

shauq-e-bām-o-dar meñ kuchh buniyād kā sochā nahīñ

ghar banātā jā rahā huuñ sāhiloñ ke sāth-sāth

us kī ik tasvīr se thā rashk-e-jannat ghar mirā

ghar meñ ab kaise rahūñ vīrāniyoñ ke sāth-sāth

chupke-chupke jaane kyā likhtā rahā huuñ rāt-bhar

baḳht bhī kaalā kiyā hai kāġhazoñ ke sāth-sāth

dūriyāñ majbūriyāñ tanhā.iyāñ be-tābiyāñ

mustaqil rahtīñ haiñ ham pardesiyoñ ke sāth-sāth

aaj is andāz se gulshan meñ lahrā.ī sabā

phuul bhī uḌne lage kuchh titliyoñ ke sāth-sāth

choT khā baiThā koī yā dil lagā baiThā kahīñ

āj-kal hotā hai 'sāgar' shā'iroñ ke sāth-sāth

dost bhi the us gali mein dushmanon ke sath-sath

phul bhi barse the mujh par pattharon ke sath-sath

ab kahan KHwab-o-KHayal o KHal-o-KHad pahle se hain

kis qadar badla hun main calendaron ke sath-sath

ab na-jaane mujh ko le jaen kahan aansu mere

ab to ek lamba safar hai paniyon ke sath-sath

shauq-e-baam-o-dar mein kuchh buniyaad ka socha nahin

ghar banata ja raha hun sahilon ke sath-sath

us ki ek taswir se tha rashk-e-jannat ghar mera

ghar mein ab kaise rahun viraniyon ke sath-sath

chupke-chupke jaane kya likhta raha hun raat-bhar

baKHt bhi kala kiya hai kaghazon ke sath-sath

duriyan majburiyan tanhaiyan be-tabiyan

mustaqil rahtin hain hum pardesiyon ke sath-sath

aaj is andaz se gulshan mein lahrai saba

phul bhi uDne lage kuchh titliyon ke sath-sath

choT kha baiTha koi ya dil laga baiTha kahin

aaj-kal hota hai 'sagar' sha'iron ke sath-sath