dost ke shahr mein jab main pahuncha shahr ka manzar achchha tha

dost ke shahr meñ jab maiñ pahuñchā shahr kā manzar achchhā thā

la.al-o-gohar se bhī us kī dahlīz kā patthar achchhā thā

bārish dhuup kī baat judā thī lā-mahdūd masāfat meñ

nañge sar par jaisā bhī thā gumbad-e-be-dar achchhā thā

kis lahje kin lafzoñ meñ shahkār-e-azal kī baat karūñ

duniyā bhar ke fan-pāroñ se ḳhaak kā paikar achchhā thā

chamak-damak ke makr se nikle karb ke bandhan TuuT ga.e

shām-e-judā.ī ke mahtāb se sub.h kā aḳhtar achchhā thā

jaane kis lālach meñ aa kar sar kā saaya bech diyā

meñh meñ bhīge yaad aayā tinkoñ kā chhappar achchhā thā

palkoñ se har zaḳhm siyā thā ik anjāne mohsin ne

sañg-zanoñ kī nagrī meñ bhī koī rafū-gar achchhā thā

'rāsiḳh' soñdhī miTTī kī aivānoñ meñ mahkār kahāñ

rauzan rauzan jhāñk ke dekhā kachchā hī ghar achchhā thā

dost ke shahr mein jab main pahuncha shahr ka manzar achchha tha

lal-o-gohar se bhi us ki dahliz ka patthar achchha tha

barish dhup ki baat juda thi la-mahdud masafat mein

nange sar par jaisa bhi tha gumbad-e-be-dar achchha tha

kis lahje kin lafzon mein shahkar-e-azal ki baat karun

duniya bhar ke fan-paron se KHak ka paikar achchha tha

chamak-damak ke makr se nikle karb ke bandhan TuT gae

sham-e-judai ke mahtab se subh ka aKHtar achchha tha

jaane kis lalach mein aa kar sar ka saya bech diya

meinh mein bhige yaad aaya tinkon ka chhappar achchha tha

palkon se har zaKHm siya tha ek anjaane mohsin ne

sang-zanon ki nagri mein bhi koi rafu-gar achchha tha

'rasiKH' sondhi miTTi ki aiwanon mein mahkar kahan

rauzan rauzan jhank ke dekha kachcha hi ghar achchha tha