dua-e-nim-shab aah-e-sahar soz-e-darun dil ka

duā-e-nīm-shab āh-e-sahar soz-e-darūñ dil kā

masīhā bhī hai monis bhī hai marham bhī hai bismil kā

ilāhī merī ġharqābī meñ kis kā haath hai āḳhir

safīna kā havā kā fitna-zā maujoñ kā sāhil kā

hai merā zauq-e-rindī qaid har mausam se bālā-tar

na maiñ pāband saaqī kā na shīshe kā na mahfil kā

ḳhudā par hai mirā īmāñ qayāmat-ḳhez tūfāñ meñ

bharosa nāḳhudā kā hai na kashtī kā na sāhil kā

diyā karte haiñ aksar dāvat-e-fikr-e-suḳhan mujh ko

sahar shabnam shafaq taare tabassum māh-e-kāmil kā

ḳhirad vaale zarā ḳhud ThanDe dil se ġhaur farmā leñ

fuġhāñ fariyād mātam naala hal hai kyā masā.il kā

jise kahte haiñ manzil imtihāñ hai asl meñ 'jauhar'

umangoñ kā junūñ kā hausloñ kā azm-e-kāmil kā

dua-e-nim-shab aah-e-sahar soz-e-darun dil ka

masiha bhi hai monis bhi hai marham bhi hai bismil ka

ilahi meri gharqabi mein kis ka hath hai aaKHir

safina ka hawa ka fitna-za maujon ka sahil ka

hai mera zauq-e-rindi qaid har mausam se baala-tar

na main paband saqi ka na shishe ka na mahfil ka

KHuda par hai mera iman qayamat-KHez tufan mein

bharosa naKHuda ka hai na kashti ka na sahil ka

diya karte hain aksar dawat-e-fikr-e-suKHan mujh ko

sahar shabnam shafaq tare tabassum mah-e-kaamil ka

KHirad wale zara KHud ThanDe dil se ghaur farma len

fughan fariyaad matam nala hal hai kya masail ka

jise kahte hain manzil imtihan hai asl mein 'jauhar'

umangon ka junun ka hauslon ka azm-e-kaamil ka