dua to rahti hai dast-e-dua nahin rahta

duā to rahtī hai dast-e-duā nahīñ rahtā

so tai huā mire ghar meñ ḳhudā nahīñ rahtā

maiñ aise dasht ko ābād karne vaalā huuñ

jahāñ pe koī bhī jugnū diyā nahīñ rahtā

tū aise dar pe khaḌā hai qasam isī dar kī

koī bhī shaḳhs yahāñ par khaḌā nahīñ rahtā

bichhaḌne vaalā mirā haath thaam kar bolā

koī makīñ kisī ghar meñ sadā nahīñ rahtā

ajiib ḳhauf hai jis kā vajūd hai hī nahīñ

kisī bhī ghar kā darīcha khulā nahīñ rahtā

hazār dil ko lubhāte hasīn manzar haiñ

koī bhī zaḳhm yahāñ par harā nahīñ rahtā

sarā-e-dil kā hai dastūr is jagah 'sābir'

kisī ke hote hue dūsrā nahīñ rahtā

dua to rahti hai dast-e-dua nahin rahta

so tai hua mere ghar mein KHuda nahin rahta

main aise dasht ko aabaad karne wala hun

jahan pe koi bhi jugnu diya nahin rahta

tu aise dar pe khaDa hai qasam isi dar ki

koi bhi shaKHs yahan par khaDa nahin rahta

bichhaDne wala mera hath tham kar bola

koi makin kisi ghar mein sada nahin rahta

ajib KHauf hai jis ka wajud hai hi nahin

kisi bhi ghar ka daricha khula nahin rahta

hazar dil ko lubhate hasin manzar hain

koi bhi zaKHm yahan par hara nahin rahta

sara-e-dil ka hai dastur is jagah 'sabir'

kisi ke hote hue dusra nahin rahta