duaen mangne se peshtar mat bhul malika

duā.eñ māñgne se peshtar mat bhuul malika

ki taḳht-o-tāj to bas paañv kī haiñ dhuul malika

nikal ke tū mahal se roz pursā de sakegī

ye qatl-e-ām to hai roz kā ma.amūl malika

unheñ tāvān meñ āñkheñ adā karnī paḌī haiñ

yahāñ jo ḳhvāb bunñe meñ hue mashġhūl malika

use sairāb honā hai atā kī bārishoñ se

ki dil kī ḳhaak par ugte nahīñ haiñ phuul malika

mujhe ma.alūm haiñ sab sāzisheñ darbāriyoñ kī

mire katbe pe likkhā jā.egā maqtūl malika

mohabbat haar ke maiñ lag rahī huuñ aaj 'komal'

kisī ujḌī riyāsat kī koī ma.azūl malika

duaen mangne se peshtar mat bhul malika

ki taKHt-o-taj to bas panw ki hain dhul malika

nikal ke tu mahal se roz pursa de sakegi

ye qatl-e-am to hai roz ka mamul malika

unhen tawan mein aankhen ada karni paDi hain

yahan jo KHwab bunne mein hue mashghul malika

use sairab hona hai ata ki barishon se

ki dil ki KHak par ugte nahin hain phul malika

mujhe malum hain sab sazishen darbariyon ki

mere katbe pe likkha jaega maqtul malika

mohabbat haar ke main lag rahi hun aaj 'komal'

kisi ujDi riyasat ki koi mazul malika