duhai dun ki khule zulm se bachae mujhe

duhā.ī duuñ ki khule zulm se bachā.e mujhe

koī nahīñ mire panje se jo chhuḌā.e mujhe

maiñ apne jism ke patthar ko Thokareñ mārūñ

magar ye shaġhl-e-aziyyat pasand aa.e mujhe

mire hī muñh ko mirā ḳhuun lag chukā hai yahāñ

mire sivā koī qātil nazar na aa.e mujhe

maiñ ishtihār lagā.ūñ badan pe ġhazloñ ke

vo chāhtā hai ki show-case meñ sajā.e mujhe

maiñ ḳhud bhī ape ishāroñ pe aaj tak na chalā

vo uñgliyoñ pe bhalā kis tarah nachā.e mujhe

maza to jab hai shuā.eñ bhī chhatriyāñ ban jaa.eñ

ḳhud āftāb chale le ke saa.e saa.e mujhe

badal chuke haiñ ravayye shikāyateñ kaisī

maiñ jis se bach ke chalūñ vo na muñh lagā.e mujhe

duhai dun ki khule zulm se bachae mujhe

koi nahin mere panje se jo chhuDae mujhe

main apne jism ke patthar ko Thokaren marun

magar ye shaghl-e-aziyyat pasand aae mujhe

mere hi munh ko mera KHun lag chuka hai yahan

mere siwa koi qatil nazar na aae mujhe

main ishtihaar lagaun badan pe ghazlon ke

wo chahta hai ki show-case mein sajae mujhe

main KHud bhi ape ishaaron pe aaj tak na chala

wo ungliyon pe bhala kis tarah nachae mujhe

maza to jab hai shuaen bhi chhatriyan ban jaen

KHud aaftab chale le ke sae sae mujhe

badal chuke hain rawayye shikayaten kaisi

main jis se bach ke chalun wo na munh lagae mujhe