dukh-dard ki ghamgin katha hai ki ghazal hai

dukh-dard kī ġhamgīn kathā hai ki ġhazal hai

har lafz mire ġham kī sadā hai ki ġhazal hai

ġhazloñ meñ taġhazzul hai tire husn kā jalva

sheroñ meñ tirā ruup sajā hai ki ġhazal hai

mad.hosh sā lagtā hai mujhe merā har ik sher

ye terī mohabbat kā nasha hai ki ġhazal hai

mujh ko to yaqīñ hotā nahīñ hai ye abhī tak

logoñ se magar maiñ ne sunā hai ki ġhazal hai

alfāz kā jaadū hai ki hai sehr-bayānī

ġhazloñ meñ mirā dard chhupā hai ki ġhazal hai

kis darja hai raushan ye taḳhayyul kā ujālā

hairāñ haiñ sabhī jaltā diyā hai ki ġhazal hai

maiñ dekh rahā huuñ ye mire sāmne 'anvar'

darvāza-e-afkār khulā hai ki ġhazal hai

dukh-dard ki ghamgin katha hai ki ghazal hai

har lafz mere gham ki sada hai ki ghazal hai

ghazlon mein taghazzul hai tere husn ka jalwa

sheron mein tera rup saja hai ki ghazal hai

madhosh sa lagta hai mujhe mera har ek sher

ye teri mohabbat ka nasha hai ki ghazal hai

mujh ko to yaqin hota nahin hai ye abhi tak

logon se magar main ne suna hai ki ghazal hai

alfaz ka jadu hai ki hai sehr-bayani

ghazlon mein mera dard chhupa hai ki ghazal hai

kis darja hai raushan ye taKHayyul ka ujala

hairan hain sabhi jalta diya hai ki ghazal hai

main dekh raha hun ye mere samne 'anwar'

darwaza-e-afkar khula hai ki ghazal hai