duniya ajib khel tamasha lage mujhe

duniyā ajiib khel tamāshā lage mujhe

har aadmī hujūm meñ tanhā lage mujhe

gūñge mujāhidoñ kā ye Thahrā huā julūs

parchhā.iyoñ kā ek jazīra lage mujhe

bāzār-e-sañg-o-ḳhisht meñ sau nāzukī ke saath

apnī hayāt kāñch kī guḌiyā lage mujhe

sūraj-mukhī kī tarah badaltī hai ruḳh hayāt

jab āftāb-e-vaqt ubhartā lage mujhe

is darja mauj-e-ḳhūñ hai ragoñ meñ sharar-fishāñ

umr-e-ravāñ to aag kā dariyā lage mujhe

pau phūTte hī duur nikal jā.ūñgā 'sahar'

sansār ek rain-baserā lage mujhe

duniya ajib khel tamasha lage mujhe

har aadmi hujum mein tanha lage mujhe

gunge mujahidon ka ye Thahra hua julus

parchhaiyon ka ek jazira lage mujhe

bazar-e-sang-o-KHisht mein sau nazuki ke sath

apni hayat kanch ki guDiya lage mujhe

suraj-mukhi ki tarah badalti hai ruKH hayat

jab aaftab-e-waqt ubharta lage mujhe

is darja mauj-e-KHun hai ragon mein sharar-fishan

umr-e-rawan to aag ka dariya lage mujhe

pau phuTte hi dur nikal jaunga 'sahar'

sansar ek rain-basera lage mujhe