duniya apni manzil pahunchi tum ghar mein bezar paDe

duniyā apnī manzil pahuñchī tum ghar meñ bezār paḌe

tum se kis ko ishq huā hai tum pe ḳhudā kī maar paḌe

dil kī bātoñ meñ aa jaanā jiite jī mar jaanā hai

ham us ke kahne meñ aa.e kitne din bīmār paḌe

gul yā gulshan se laḌ jaanā khel hai apnī nazroñ kā

aisī ghaḌī allāh na laa.e jab dil se takrār paḌe

gar na sadaf se bāhar aate ik din motī ban jaate

kam-zarfī ne ḳhvār kiyā hai sāhil par ho baar paḌe

hijr kī muddat dard ke lamhe kyā kyā ma.anī rakhte haiñ

ye sab bāteñ vo dil jaane jis par ġham kā baar paḌe

duniyā taj kar ishq ke raste aa.e vo bhī sahl paḌā

'vajd' ab us raste par jaao jo rasta dushvār paḌe

duniya apni manzil pahunchi tum ghar mein bezar paDe

tum se kis ko ishq hua hai tum pe KHuda ki mar paDe

dil ki baaton mein aa jaana jite ji mar jaana hai

hum us ke kahne mein aae kitne din bimar paDe

gul ya gulshan se laD jaana khel hai apni nazron ka

aisi ghaDi allah na lae jab dil se takrar paDe

gar na sadaf se bahar aate ek din moti ban jate

kam-zarfi ne KHwar kiya hai sahil par ho bar paDe

hijr ki muddat dard ke lamhe kya kya mani rakhte hain

ye sab baaten wo dil jaane jis par gham ka bar paDe

duniya taj kar ishq ke raste aae wo bhi sahl paDa

'wajd' ab us raste par jao jo rasta dushwar paDe