duniya-dari ke chakkar mein dekho kya kya bhul gae

duniyā-dārī ke chakkar meñ dekho kyā kyā bhuul ga.e

jhūThe rishte yaad rahe sab sachchā rishta bhuul ga.e

tum us din kuchh kahne vaale the mujh se batlāo ab

achchhā Thahro batlātā huuñ aur phir kahnā bhuul ga.e

jis raste par sau aafat hai ham ne use ābād kiyā

jo dil se dil tak jaatā thā sīdhā rasta bhuul ga.e

un bāhoñ ko yaad nahīñ kyā un kī zimme-dārī thī

is tan ko bhī yaad nahīñ hai kyoñ ham sajnā bhuul ga.e

aaj mileñge to kah deñge man meñ rakkhī sab bāteñ

kitnā kuchh us se kahnā thā lekin kahnā bhuul ga.e

dil se dil tak jaane meñ āsānī thī so chale ga.e

jaanā hī bas yaad rahā hai lauT ke aanā bhuul ga.e

ġhalatī kar ke aḳhbāroñ meñ chhapvāne kā fashion hai

apne kiye par ham sharmānā aur pachhtānā bhuul ga.e

sulh-safā.ī 'anjanā' maiñ ne us se kar to lī lekin

dil bhī thā nārāz bahut us ko samjhānā bhuul ga.e

duniya-dari ke chakkar mein dekho kya kya bhul gae

jhuThe rishte yaad rahe sab sachcha rishta bhul gae

tum us din kuchh kahne wale the mujh se batlao ab

achchha Thahro batlata hun aur phir kahna bhul gae

jis raste par sau aafat hai hum ne use aabaad kiya

jo dil se dil tak jata tha sidha rasta bhul gae

un bahon ko yaad nahin kya un ki zimme-dari thi

is tan ko bhi yaad nahin hai kyon hum sajna bhul gae

aaj milenge to kah denge man mein rakkhi sab baaten

kitna kuchh us se kahna tha lekin kahna bhul gae

dil se dil tak jaane mein aasani thi so chale gae

jaana hi bas yaad raha hai lauT ke aana bhul gae

ghalati kar ke aKHbaron mein chhapwane ka fashion hai

apne kiye par hum sharmana aur pachhtana bhul gae

sulh-safai 'anjana' main ne us se kar to li lekin

dil bhi tha naraaz bahut us ko samjhana bhul gae