duniya-e-be-libas hai is intizar mein

duniyā-e-be-libās hai is intizār meñ

dekhe hameñ bhī pairahan-e-tār-tār meñ

laatā hai kaun shor-e-nafas ko shumār meñ

sab jī rahe haiñ ālam-e-nā-pā.edār meñ

bhaTke tamām umr to ye munkashif huā

ham harf-e-rā.egāñ the ḳhat-e-intishār meñ

āñkheñ na thiiñ to vo bhī nazar se utar ga.e

kyā kyā hasīn ḳhvāb the is jalva-zār meñ

sūraj ne din tamām kiyā thak ke so gayā

maiñ ghūmtā rahā magar apne madār meñ

vahm-o-gumāñ kī tez havā.eñ haiñ mushta.il

raushan hai ik charāġh dar-e-e.atibār meñ

kaaTe the us ne shaġhl-e-samā.at meñ rāt-din

kyā thā hamāre tazkira-e-kam-ayār meñ

jaa.eñ kidhar ki raah koī sūjhtī nahīñ

raste meñ sab aTe hue gard-o-ġhubār meñ

muddat huī maiñ niiñd se jaagā nahīñ 'ziyā'

kis ne mujhe uchhāl diyā tiira ġhaar meñ

duniya-e-be-libas hai is intizar mein

dekhe hamein bhi pairahan-e-tar-tar mein

lata hai kaun shor-e-nafas ko shumar mein

sab ji rahe hain aalam-e-na-paedar mein

bhaTke tamam umr to ye munkashif hua

hum harf-e-raegan the KHat-e-intishaar mein

aankhen na thin to wo bhi nazar se utar gae

kya kya hasin KHwab the is jalwa-zar mein

suraj ne din tamam kiya thak ke so gaya

main ghumta raha magar apne madar mein

wahm-o-guman ki tez hawaen hain mushtail

raushan hai ek charagh dar-e-eatibar mein

kaTe the us ne shaghl-e-samaat mein raat-din

kya tha hamare tazkira-e-kam-ayar mein

jaen kidhar ki rah koi sujhti nahin

raste mein sab aTe hue gard-o-ghubar mein

muddat hui main nind se jaga nahin 'ziya'

kis ne mujhe uchhaal diya tera ghaar mein