duniya-e-haqiqat se wo begana nahin hai

duniyā-e-haqīqat se vo begāna nahīñ hai

dīvāna jise kahte ho dīvāna nahīñ hai

labrez junūñ kā abhī paimāna nahīñ hai

nazroñ se ayaañ laġhzish-e-mastāna nahīñ hai

bas hāsil-e-kaunain ise yaad hai un kī

mānūs-e-do-ālam dil-e-dīvāna nahīñ hai

bikhre hue taare haiñ jigar-chāk gul-e-tar

kyā ye mirī barbādī kā afsāna nahīñ hai

ik parda-e-mahbūb hai ik rāz-e-haqīqat

dīvāna kisī rang se dīvāna nahīñ hai

rahne do hijāb-e-ġham-e-dil meñ ise pinhāñ

is bazm ke qābil mirā afsāna nahīñ hai

jo kaif-e-alam bārish-e-ġham se ho gurezāñ

jo dard se ghabrā.e vo dīvāna nahīñ hai

tarkīb badal jaa.e to ho jaa.e haqīqat

unvān badal jaa.e to afsāna nahīñ hai

hai tum se shikāyat kā irāda sar-e-mahfil

andāz magar dil kā harīfāna nahīñ hai

jo mujh se gunahgār ko firdaus na baḳhshe

aisī to tirī shān-e-karīmāna nahīñ hai

kyā haq hai 'vakīl' us ko mohabbat meñ jiye vo

jo un ke liye ishq meñ dīvāna nahīñ hai

duniya-e-haqiqat se wo begana nahin hai

diwana jise kahte ho diwana nahin hai

labrez junun ka abhi paimana nahin hai

nazron se ayan laghzish-e-mastana nahin hai

bas hasil-e-kaunain ise yaad hai un ki

manus-e-do-alam dil-e-diwana nahin hai

bikhre hue tare hain jigar-chaak gul-e-tar

kya ye meri barbaadi ka afsana nahin hai

ek parda-e-mahbub hai ek raaz-e-haqiqat

diwana kisi rang se diwana nahin hai

rahne do hijab-e-gham-e-dil mein ise pinhan

is bazm ke qabil mera afsana nahin hai

jo kaif-e-alam barish-e-gham se ho gurezan

jo dard se ghabrae wo diwana nahin hai

tarkib badal jae to ho jae haqiqat

unwan badal jae to afsana nahin hai

hai tum se shikayat ka irada sar-e-mahfil

andaz magar dil ka harifana nahin hai

jo mujh se gunahgar ko firdaus na baKHshe

aisi to teri shan-e-karimana nahin hai

kya haq hai 'wakil' us ko mohabbat mein jiye wo

jo un ke liye ishq mein diwana nahin hai