duniya-e-KHarabaat se pahle bhi kahin tha

duniyā-e-ḳharābāt se pahle bhī kahīñ thā

maiñ apnī mulāqāt se pahle bhī kahīñ thā

aalam to abhī kal ke haiñ taḳhlīq mire dost

maiñ arz-o-samāvāt se pahle bhī kahīñ thā

maiñ aaj bhī huuñ kal bhī kahīñ hūñgā yaqīnan

aur arsa-e-auqāt se pahle bhī kahīñ thā

kahte the malā.ek ki ye insān hai fitna

ya.anī ki maiñ ḳhadshāt se pahle bhī kahīñ thā

logoñ ko to idrāk mirā aaj huā hai

maiñ saarī ḳhurāfāt se pahle bhī kahīñ thā

har shai kī mire dam se hī pahchān huī hai

maiñ kashf-o-karāmāt se pahle bhī kahīñ thā

maiñ hazrat-e-insān anal-ishq anal-husn

aadam kī hikāyāt se pahle bhī kahīñ thā

har chiiz mire vāste raqsāñ hai jahāñ kī

maiñ mahfil-o-naġhmāt se pahle bhī kahīñ thā

jis raat ḳhudā-pāk ne iqrār liyā thā

'tahsīn' maiñ us raat se pahle bhī kahīñ thā

duniya-e-KHarabaat se pahle bhi kahin tha

main apni mulaqat se pahle bhi kahin tha

aalam to abhi kal ke hain taKHliq mere dost

main arz-o-samawat se pahle bhi kahin tha

main aaj bhi hun kal bhi kahin hunga yaqinan

aur arsa-e-auqat se pahle bhi kahin tha

kahte the malaek ki ye insan hai fitna

yani ki main KHadshat se pahle bhi kahin tha

logon ko to idrak mera aaj hua hai

main sari KHurafat se pahle bhi kahin tha

har shai ki mere dam se hi pahchan hui hai

main kashf-o-karamat se pahle bhi kahin tha

main hazrat-e-insan anal-ishq anal-husn

aadam ki hikayat se pahle bhi kahin tha

har chiz mere waste raqsan hai jahan ki

main mahfil-o-naghmat se pahle bhi kahin tha

jis raat KHuda-pak ne iqrar liya tha

'tahsin' main us raat se pahle bhi kahin tha