duniya-e-rang-o-bu se kinara nahin kiya

duniyā-e-rañg-o-bū se kināra nahīñ kiyā

achchhā kiyā jo ham ne dikhāvā nahīñ kiyā

ham jism ko bachā na sake gard se magar

ye to kiyā ki ruuh ko mailā nahīñ kiyā

auroñ par apnī zaat kī tarjīh to bajā

ham ne kuchh apne saath bhī achchhā nahīñ kiyā

chup-chāp bāhar aa ga.e rassa-kashī se ham

zāhir kisī pe apnā irāda nahīñ kiyā

bas Dūbte ubharte rahe haiñ tamām umr

ham ne ubuur karb kā dariyā nahīñ kiyā

kuchh dhuup us ko chiir ke ham tak pahuñch ga.ī

kuchh ham par us daraḳht ne saaya nahīñ kiyā

'betāb' jānkār sabhī kartaboñ ke the

kuchh baat thī jo ham ne tamāshā nahīñ kiyā

duniya-e-rang-o-bu se kinara nahin kiya

achchha kiya jo hum ne dikhawa nahin kiya

hum jism ko bacha na sake gard se magar

ye to kiya ki ruh ko maila nahin kiya

auron par apni zat ki tarjih to baja

hum ne kuchh apne sath bhi achchha nahin kiya

chup-chap bahar aa gae rassa-kashi se hum

zahir kisi pe apna irada nahin kiya

bas Dubte ubharte rahe hain tamam umr

hum ne ubur karb ka dariya nahin kiya

kuchh dhup us ko chir ke hum tak pahunch gai

kuchh hum par us daraKHt ne saya nahin kiya

'betab' jaankar sabhi kartabon ke the

kuchh baat thi jo hum ne tamasha nahin kiya