duniya ki dil dukhane ki aadat nahin gai

duniyā kī dil dukhāne kī aadat nahīñ ga.ī

apnī bhī muskurāne kī aadat nahīñ ga.ī

dāman jalā ye dil jalā ye uñgliyāñ jalīñ

apnī diye jalāne kī aadat nahīñ ga.ī

kuchh vo ġhanīm-e-jān bhī hai mustaqil-mizāj

kuchh merī jaañ se jaane kī aadat nahīñ ga.ī

us se kaho ḳhulūs se luuTā kare mujhe

merī fareb khāne kī aadat nahīñ ga.ī

vo shahr bad-nasīb hai us ke mizāj meñ

mohsin kā ghar jalāne kī aadat nahīñ ga.ī

kuchh raushnī se un ko adāvat azal se hai

kuchh apnī jagmagāne kī aadat nahīñ ga.ī

phūñkoñ se āftāb bujhāne kī justujū

bachchoñ sī is zamāne kī aadat nahīñ ga.ī

go talḳhī-e-hayāt se pathrā gayā vo shaḳhs

lekin ġhazal sunāne kī aadat nahīñ ga.ī

duniya ki dil dukhane ki aadat nahin gai

apni bhi muskurane ki aadat nahin gai

daman jala ye dil jala ye ungliyan jalin

apni diye jalane ki aadat nahin gai

kuchh wo ghanim-e-jaan bhi hai mustaqil-mizaj

kuchh meri jaan se jaane ki aadat nahin gai

us se kaho KHulus se luTa kare mujhe

meri fareb khane ki aadat nahin gai

wo shahr bad-nasib hai us ke mizaj mein

mohsin ka ghar jalane ki aadat nahin gai

kuchh raushni se un ko adawat azal se hai

kuchh apni jagmagane ki aadat nahin gai

phunkon se aaftab bujhane ki justuju

bachchon si is zamane ki aadat nahin gai

go talKHi-e-hayat se pathra gaya wo shaKHs

lekin ghazal sunane ki aadat nahin gai