duniya ki jafaen bhul gain taqdir ka shikwa bhul gae

duniyā kī jafā.eñ bhuul ga.iiñ taqdīr kā shikva bhuul ga.e

jab un se nigāheñ chaar huiiñ sab apnā-parāyā bhuul ga.e

ik mast-e-nazar ne saaqī kī rindoñ pe kuchh aisā sehr kiyā

fikr-e-mai-o-mīnā kyā kahiye zikr-e-mai-o-mīnā bhuul ga.e

ham aur kisī kī bazm-e-tarab ye raaz samajh meñ aa na sakā

ai ishq kahīñ aisā to nahīñ vo ham ko bhulānā bhuul ga.e

us jān-e-bahārāñ ne jab se muñh pher liyā hai gulshan se

shāḳhoñ ne lachaknā chhoḌ diyā ġhunche bhī chaTaknā bhuul ga.e

rahmat kā sabab thī pursish-e-ġham lekin ye tamāshā ḳhuub rahā

vo chheḌ ke sunñā bhuul ga.e ham kah ke sunānā bhuul ga.e

kulfat meñ maze āsā.ish ke phūloñ pe gumāñ angāroñ kā

nashshe meñ javānī ke goyā ham fitrat-e-duniyā bhuul ga.e

barbād-e-ġham aise aise bhī dekhe haiñ isī duniyā meñ kabhī

ham jin kī shikasta-hālī par do ashk bahānā bhuul ga.e

andāza-e-soz-e-ġham na kiyā ye bhuul huī ham se pahle

phir us pe qayāmat vo apne dāman ko bachānā bhuul ga.e

tūfān-e-mohabbat meñ ham ne paayā hai 'adīb' is tarah sukūñ

āñkhoñ se kinārā ojhal thā dil se bhī kinārā bhuul ga.e

duniya ki jafaen bhul gain taqdir ka shikwa bhul gae

jab un se nigahen chaar huin sab apna-paraya bhul gae

ek mast-e-nazar ne saqi ki rindon pe kuchh aisa sehr kiya

fikr-e-mai-o-mina kya kahiye zikr-e-mai-o-mina bhul gae

hum aur kisi ki bazm-e-tarab ye raaz samajh mein aa na saka

ai ishq kahin aisa to nahin wo hum ko bhulana bhul gae

us jaan-e-bahaaran ne jab se munh pher liya hai gulshan se

shaKHon ne lachakna chhoD diya ghunche bhi chaTakna bhul gae

rahmat ka sabab thi pursish-e-gham lekin ye tamasha KHub raha

wo chheD ke sunna bhul gae hum kah ke sunana bhul gae

kulfat mein maze aasaish ke phulon pe guman angaron ka

nashshe mein jawani ke goya hum fitrat-e-duniya bhul gae

barbaad-e-gham aise aise bhi dekhe hain isi duniya mein kabhi

hum jin ki shikasta-haali par do ashk bahana bhul gae

andaza-e-soz-e-gham na kiya ye bhul hui hum se pahle

phir us pe qayamat wo apne daman ko bachana bhul gae

tufan-e-mohabbat mein hum ne paya hai 'adib' is tarah sukun

aankhon se kinara ojhal tha dil se bhi kinara bhul gae