duniya mein be-hijab meri zat bhi to ho

duniyā meñ be-hijāb mirī zaat bhī to ho

ai 'ishq terī koī karāmāt bhī to ho

kuchh zer-e-ġhaur sūrat-e-hālāt bhī to ho

sarkār ehtirām-e-rivāyāt bhī to ho

tārīkiyoñ kī ḳhatm kabhī raat bhī to ho

ai kirdgār sub.h-e-mukāfāt bhī to ho

tū jāntā hai phir bhī hai iqrār-e-ma.asiyat

sharminda-e-vajūd mirī zaat bhī to ho

ye kyā ki ahl-e-zohd haiñ aur bārgāh-e-nāz

mahfil meñ koī rind-e-ḳharābāt bhī to ho

mansūr ke fasāne kā kyā zikr bār-bār

ye 'āshiqī meñ koī na.ī baat bhī to ho

ab jalva-gāh dil ko banā le bajā-e-tūr

thoḌī bahut talāfī-e-māfāt bhī to ho

ye be-ruḳhī ye qahr ye tevar ye barhamī

rūdād-e-ġham meñ aisī koī baat bhī to ho

tū shaam hī se fikr-e-sahar meñ niDhāl hai

ai bad-nasīb pahle basar raat bhī to ho

fitrat ne de ke garmī-e-dil chaal ye chalī

insān kī anā ko kahīñ maat bhī to ho

rūdād-e-ġham jafā-e-falak dāstān-e-hijr

sab kuchh kaheñge un se mulāqāt bhī to ho

duniya mein be-hijab meri zat bhi to ho

ai 'ishq teri koi karamat bhi to ho

kuchh zer-e-ghaur surat-e-haalat bhi to ho

sarkar ehtiram-e-riwayat bhi to ho

tarikiyon ki KHatm kabhi raat bhi to ho

ai kirdgar subh-e-mukafat bhi to ho

tu jaanta hai phir bhi hai iqrar-e-masiyat

sharminda-e-wajud meri zat bhi to ho

ye kya ki ahl-e-zohd hain aur bargah-e-naz

mahfil mein koi rind-e-KHarabaat bhi to ho

mansur ke fasane ka kya zikr bar-bar

ye 'ashiqi mein koi nai baat bhi to ho

ab jalwa-gah dil ko bana le baja-e-tur

thoDi bahut talafi-e-mafat bhi to ho

ye be-ruKHi ye qahr ye tewar ye barhami

rudad-e-gham mein aisi koi baat bhi to ho

tu sham hi se fikr-e-sahar mein niDhaal hai

ai bad-nasib pahle basar raat bhi to ho

fitrat ne de ke garmi-e-dil chaal ye chali

insan ki ana ko kahin mat bhi to ho

rudad-e-gham jafa-e-falak dastan-e-hijr

sab kuchh kahenge un se mulaqat bhi to ho