duniya mein gham raha na ba-zahir KHushi rahi

duniyā meñ ġham rahā na ba-zāhir ḳhushī rahī

jis vaqt tak jiye ḳhalish-e-zindagī rahī

jab tak mirī nazar meñ tajallī tirī rahī

ḳhud rahbar-e-ḳhirad mirī dīvāngī rahī

ham to sunā ke ġham kā fasāna chale ga.e

sunte haiñ der tak tire lab par hañsī rahī

aksar shab-e-firāq sitāroñ kī chhāñv meñ

yaad aap kī sharīk-e-ġham-e-bekasī rahī

aisā bhī ik maqām mohabbat meñ aa gayā

vo iztirāb-e-shauq na vo be-ḳhudī rahī

nazreñ milā ke tum se yahī sochtā rahā

iz.hār-e-dard dil meñ kahāñ tak kamī rahī

taskīn kā ḳhayāl bhī aatā nahīñ mujhe

achchhā huā na un kī navāzish kabhī rahī

un kī samajh meñ aa ga.iiñ majbūriyāñ mirī

is jabr-e-zindagī meñ bhī ik zindagī rahī

kaliyoñ ke bāñkpan meñ guloñ ke nikhār meñ

gulshan meñ har taraf tirī jalvagarī rahī

samjheñge ahl-e-dil ise tauhīn-e-bandagī

'sājid' rahīn-e-sajda agar bandagī rahī

duniya mein gham raha na ba-zahir KHushi rahi

jis waqt tak jiye KHalish-e-zindagi rahi

jab tak meri nazar mein tajalli teri rahi

KHud rahbar-e-KHirad meri diwangi rahi

hum to suna ke gham ka fasana chale gae

sunte hain der tak tere lab par hansi rahi

aksar shab-e-firaq sitaron ki chhanw mein

yaad aap ki sharik-e-gham-e-bekasi rahi

aisa bhi ek maqam mohabbat mein aa gaya

wo iztirab-e-shauq na wo be-KHudi rahi

nazren mila ke tum se yahi sochta raha

izhaar-e-dard dil mein kahan tak kami rahi

taskin ka KHayal bhi aata nahin mujhe

achchha hua na un ki nawazish kabhi rahi

un ki samajh mein aa gain majburiyan meri

is jabr-e-zindagi mein bhi ek zindagi rahi

kaliyon ke bankpan mein gulon ke nikhaar mein

gulshan mein har taraf teri jalwagari rahi

samjhenge ahl-e-dil ise tauhin-e-bandagi

'sajid' rahin-e-sajda agar bandagi rahi