duniya ne bas thaka hi diya kaam kam hue

duniyā ne bas thakā hī diyā kaam kam hue

terī galī meñ aa.e to kuchh tāza-dam hue

uqda khulā to dard ke rishte baham hue

dāman ke saath ab ke garebāñ bhī nam hue

jab se asīr-e-silsila-e-besh-o-kam hue

ham ko salīb apne hī naqsh-e-qadam hue

badlī zarā jo tarz-e-ḳhirām-e-sitārgāñ

nuqtoñ meñ aañkh biich sahīfe raqam hue

the muntazir hamāre bhī gul-chehragān-e-shahr

lekin rihā giraft-e-jahāñ se na ham hue

rah kar jin intihāoñ meñ apnī guzar ga.ī

is tarah jiine vaale to jāñ-bar hī kam hue

dīvār par gaḌe hue TukḌe pe kāñch ke

ye kis hisār-e-rañg meñ mahsūr ham hue

chashmak ye dhuup chhāñv kī aur ek zard phuul

ik jān-e-nā-tavāñ pe hazāroñ sitam hue

yaktā o be-nazīr hai vo kyā use ġharaz

ḳhārij hue ki dāḳhil-e-kāba sanam hue

'shāhīn' the kamāl ke rutba-shanās-e-dahr

par apnī manzilat se ḳhud āgāh kam hue

duniya ne bas thaka hi diya kaam kam hue

teri gali mein aae to kuchh taza-dam hue

uqda khula to dard ke rishte baham hue

daman ke sath ab ke gareban bhi nam hue

jab se asir-e-silsila-e-besh-o-kam hue

hum ko salib apne hi naqsh-e-qadam hue

badli zara jo tarz-e-KHiram-e-sitargan

nuqton mein aankh bich sahife raqam hue

the muntazir hamare bhi gul-chehragan-e-shahr

lekin riha giraft-e-jahan se na hum hue

rah kar jin intihaon mein apni guzar gai

is tarah jine wale to jaan-bar hi kam hue

diwar par gaDe hue TukDe pe kanch ke

ye kis hisar-e-rang mein mahsur hum hue

chashmak ye dhup chhanw ki aur ek zard phul

ek jaan-e-na-tawan pe hazaron sitam hue

yakta o be-nazir hai wo kya use gharaz

KHarij hue ki daKHil-e-kaba sanam hue

'shahin' the kamal ke rutba-shanas-e-dahr

par apni manzilat se KHud aagah kam hue