duniya se aaj jazb-e-wafa mangta hun main

duniyā se aaj jazb-e-vafā māñgtā huuñ maiñ

ye jurm hai agar to sazā māñgtā huuñ maiñ

kis moḌ par hayāt ke chhoḌā hai tum ne saath

ik ik se aaj apnā pata māñgtā huuñ maiñ

maiñ ne to kī thī dard-e-musalsal kī aarzū

tum ko gumāñ huā ki davā māñgtā huuñ maiñ

ra.anā.ī-e-bahār baḌhāne ke vāste

terā jamāl terī adā māñgtā huuñ maiñ

barsāo mujh pe sañg ba-nām-e-ḳhulūs-e-ishq

apne kiye kī aap sazā māñgtā huuñ maiñ

tum māñgte ho saarī ḳhudā.ī to maañg lo

apne liye to sirf ḳhudā māñgtā huuñ maiñ

kyā jaane ab sameT ke saarī tabāhiyāñ

is daur-e-iztirāb se kyā māñgtā huuñ maiñ

qātil ko ġham-gusār samajhtā huuñ ab 'ra.īs'

maqtal meñ zindagī kī duā māñgtā huuñ maiñ

duniya se aaj jazb-e-wafa mangta hun main

ye jurm hai agar to saza mangta hun main

kis moD par hayat ke chhoDa hai tum ne sath

ek ek se aaj apna pata mangta hun main

main ne to ki thi dard-e-musalsal ki aarzu

tum ko guman hua ki dawa mangta hun main

ranai-e-bahaar baDhane ke waste

tera jamal teri ada mangta hun main

barsao mujh pe sang ba-nam-e-KHulus-e-ishq

apne kiye ki aap saza mangta hun main

tum mangte ho sari KHudai to mang lo

apne liye to sirf KHuda mangta hun main

kya jaane ab sameT ke sari tabahiyan

is daur-e-iztirab se kya mangta hun main

qatil ko gham-gusar samajhta hun ab 'rais'

maqtal mein zindagi ki dua mangta hun main